Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 500 Hüküm no: 617 Orijinal metin no: [94b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kerime Hatun bt. Ahmed Efendi’nin ölen kızından düşen miras hisse bedelini Abdülkâdir Efendi b. İbrahim Efendi’den aldığı Medîne-i Hazret-i Ebâ Eyyûb-i Ensârî’de Davud Ağa mahallesinde iken bundan akdem fevt olan Atiyye bt. Resul nâm hâtunun verâseti zevci umdetü’l-kuzât Abdülkādir Efendi b. İbrahim Efendi ile vâlidesi Kerime Hâtun bt. el-merhûm Ahmed Efendi ve sadrî sagīr oğlu Mehmed Emin Çelebi’ye münhasıra olup tashîh-i mes’eleleri on iki sehimden i‘tibâr olunup sihâm-ı mezkûreden üç sehmi mûmâ-ileyh Abdülkādir Efendi’ye ve iki sehmi merkūme Kerime Hâtun’a ve yedi sehmi sagīr-i mezbûr emîni Mehmed Emin Çelebi’ye isâbet ve intikāl edip şer‘an zâhir ve müte‘ayyin oldukdan sonra mezbûre Kerime Hâtun tarafından husûs-ı âti’l-beyâna ikrâra vekîl olup hasm-ı câhid mahzarında mezbûrenin zâtını ma‘rifet-i şer‘iyye ile ârifân olan İbrahim b. Hasan ve Sâlih Çelebi b. Mehmed şehâdetleri ile şer‘an vekâleti sâbite olan Nasuh Efendi b. Abdüsselâm [95a] meclis-i şer‘-i şerîfde müteveffât-ı mezbûrenin muhallefâtından vâzı‘ü’l-yed olan zevci işbu râfi‘ü’l-kitâb mûmâ-ileyh Abdülkādir Efendi mahzarında bi’l-vekâle ikrâr ve takrîr-i kelâm edip müvekkilem mezbûre Kerime Hâtun kızı müteveffât-ı mezbûre Atiyye’nin muhallefâtından benim iki sehim hisse-i mezkûreme isâbet ve intikāl eden beş bin üç yüz kırk sekiz akçe hakkımı mûmâ-ileyh Abdülkādir Efendi yedinden bi’t-tamâm ahz ve kabz eyledim ba‘de’l-yevm kızı müteveffât-ı mezbûrenin muhallefâtına müte‘allika cemî‘ da‘vâdan mûmâ-ileyh Abdülkādir Efendi’nin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedi dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâdis aşer min şehri Ramazâni’l-mübârek li sene ihdâ ve tis‘în ve elf. Şuhûdü’l-hâl: İshak Efendi b. Veli Müderris, Eyüb Efendi b. Mehmed, Molla Mustafa b. Mehmed, Sâlih Çelebi b. Mehmed, Abdi Çelebi b. ( ), Yusuf b. Abdullah, Hüseyin b. Ali.