Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 501 Hüküm no: 618 Orijinal metin no: [95a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Musa b. Ramazan’ın Abdullah Efendi b. Ahmed Efendi’yi vasî tayin ettiğinin tespiti Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî-’de bi’l-fi‘l emîn-i Beytülmâl olan Ahmed Çelebi b. Mehmed meclis-i şer‘-i şerîfde işbu râfi‘ü’l-kitâb Abdullah Efendi b. el-merhûm Ahmed Efendi mahzarında bi’l-emâne üzerine da‘vâ ve takrîr-i kelâm edip mûmâ-ileyh Abdullah Efendi’nin medîne-i mezbûrede Takyecibaşı mahallesinde vâki‘ mülk menzilinde müsâferet vechi üzre sâkin iken bundan akdem vefât eden Musa b. Ramazan nâm kimesnenin zâhirde vâris-i ma‘rûfu olmamağla terekesi Beytülmâle âid olmuş iken mezbûr Abdullah Efendi mecmû‘ terekesine vaz‘-ı yed eder suâl olunup tereke-i müteveffâ-yı mezbûrdan kasr-ı yed edip bana teslîme tenbîh olunmak matlûbumdur dedikde gıbbe’s-suâl mûmâ-ileyh Abdullah Efendi cevâbında fi’l-hakīka müteveffâ-yı mezbûr Musa marîz ve sâhib-i firâş iken nukūd ve menkūlât ve sâir kalîl ve kesîr ism-i mâl ıtlâk olunur cemî‘ terekesinden yüz guruşunu hîn-i fevtinde techîz ve tekfîne ve sâir mevtâ-yı müslimîne lâzım ve lâ-büd olan mesâlihe harc ve sarf olunup ve mâ‘adâ kalan terekesini ba‘de’l-bey‘ semenlerini mezkûr Takyeci mescid-i şerîfinde eczâ-i şerîfe vaz‘ olunmak üzre vasiyyet edip vesâyâsını ber vech-i muharrer tenfîz için beni vasiyy-i muhtâr nasb ve ta‘yîn edip ben dahi vesâyet-i merkūmeyi kabûl ve merâsimini edâya ta‘ahhüd etmekle ber mûceb-i vasiyyet müteveffâ-yı mezkûrun terekesine vaz‘-ı yed eyledim diyecek, isre’l-istintâk ve akībe’l-inkâr ve gıbbe talebi’l-beyyine mûmâ-ileyh Abdullah Efendi’den takrîrine mutâbık beyyine taleb olundukda udûl-i ricâlden olup medîne-i mezkûrede Câmi‘-i Kebîr mahallesi sükkânından Hüseyin Efendi b. Ahmed ve el-Hâc Hasan b. Mehmed nâm kimesneler li ecli’ş-şehâde mahfil-i kazâda hâzırân olup istişhâd olunduklarında fi’l-vâki‘ müteveffâ-yı mezbûr Musa minvâl-i muharrer üzre marîz ve sâhib-i firâş iken nukūd ve menkūlât ve sâir kalîl ve kesîr ism-i mâl ıtlâk olunur cemî‘ terekesinden yüz guruşunu hîn-i fevtinde techîz ve tekfînine ve sâir mevtâ-yı müslimîne lâzım olan mesâlih için harc ve sarf olunup mâ‘adâ kalan terekesini ba‘de’l-bey‘ semenlerini mezkûr Takyeci mescid-i şerîfinde eczâ-i şerîfe vaz‘ olunmak üzre vasiyyet edip ber vech-i muharrer vesâyâsını tenfîz için mûmâ-ileyh Abdullah Efendi’yi bizim huzûrumuzda vasiyy-i muhtâr nasb ve ta‘yîn ve ihtiyâr eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylelediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebiyle ba‘de’l-hükm, mâ vaka‘a bi’t-taleb ketb olundu. Fi’l-yevmi’s-sânî aşer min şehri Ramazâni’l-mübârek li sene ihdâ ve tis‘în ve elf. Şuhûdü’l-hâl: Hüseyin Efendi Mukayyid, Nasuh Efendi b. Abdüsselâm, Mehmed b. Eyüb, Hüseyin b. Ali, Mustafa Efendi el-Kâtib.