Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 502 Hüküm no: 619 Orijinal metin no: [95a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Avanos v. Tomas’la kardeşi Bağdasar’ın miras konusunda birbirlerinin zimmetlerini ibra etmesi Mahmiye-i İstanbul’da hısnı ebvâbından Balatkapısı dâhilinde Loncayeri demekle ma‘rûf mahalde sâkin Avanos v. Tomas nâm zimmî mahfil-i kazâda li ebeveyn er karındaşı râfi‘ü’r-rakīm Bağdasar nâm Ermeni muvâcehesinde ikrâr-ı tâm ve takrîr-i kelâm edip bundan akdem mürd olan babamız Tomas nâm hâlikin verâseti ikimize münhasıra olmağla babamız hâlik-i mezbûrun terekesinden olan nukūd ve arûz ve menkūlât ve sâir ism-i mâl ıtlâk olunur kalîl ü kesîr ve celîl ü hakīr metrûkâtını alâ mâ farazallâh beynimizde tevzî‘ ve taksîm edip benim nısf hisse-i şâyi‘ama isâbet eden hakkımı bi’t-tamâm ahz ve kabz eyledim min ba‘d babam hâlik-i mezbûrun metrûkâtına müte‘allika da‘vâdan her birimiz âharın zimmetini ibrâ ve iskāt eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâdis aşer min şehri Ramazâni’l-mübârek li sene ihdâ ve tis‘în ve elf. Şuhûdü’l-hâl: Hüseyin b. Ali, Mehmed b. Eyüb, Ali b. İslâm, Yusuf b. Abdullah, Manas [v.] Aydın, Karabet [v.] Yani, Yanaki [v.] Hristo, Ayvas [v.] Yanik.