Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 502 Hüküm no: 620 Orijinal metin no: [95a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim b. Receb’in satın aldığı cariyenin ücretinden İbrahim Ağa b. Muzaffer’e borçlu olduğu Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî-’de Şah Sultan mahallesi sükkânından işbu râfi‘ü’l-kitâb İbrahim Ağa b. Muzaffer nâm kimesne meclis-i şer‘-i şerîfde diğer İbrahim Bey b. Receb mahzarında üzerine da‘vâ ve takrîr-i kelâm edip orta boylu, kara gözlü, kara kaşlı Çerkesiyyetü’l-asl gāib ani’l-meclis Gülnûş bt. Abdullah nâm câriye-i memlûkemi târih-i kitâbdan beş gün mukaddem mezbûr İbrahim Bey’e iki yüz yetmiş beş esedî guruşa bey‘-i kat‘î ile bey‘ ve teslîm ol dahi üç güne değin muhayyer olmak üzre iştirâ ve tesellüm ve kabûl eyledikden sonra semeni olan meblağ-ı mezkûrun yirmi beş guruşunu mezbûr İbrahim yedinden ahz ve kabz edip zimmetinde iki yüz elli esedî guruş hakkım bâkī kalmışidi hâlâ müddet-i hıyâr tamâm oldukdan sonra iki gün dahi istihdâm ve mürûr etmekle meblağ-ı bâkī-i mezkûru taleb eylediğimde edâdan imtinâ‘ eder suâl olunup edâsına tenbîh olunmak matlûbumdur dedikde gıbbe’s-suâl mezbûr İbrahim Bey cevâbında fi’l-hakīka câriye-i mevsûfe-i merkūme Gülnûş’u meblağ-ı mersûm iki yüz yetmiş beş esedî guruşa müdde‘î-i mezbûr İbrahim Ağa’dan vech-i muharrer [üzre] iştirâ ve tesellüm edip meblağ-ı mezkûrun yirmi beş guruşunu [95b] müdde‘î-i mezbûra def‘ ve teslîm eyleyip bâkī zimmetinde iki yüz elli esedî guruş kaldığını ve müddet-i hıyâr tamâmından sonra iki gün dahi mürûr ve istihdâm eylediğini tav‘an ikrâr ve i‘tirâf etmeğin alâ mûcebi ikrârihî meblağ-ı bâkī-i mezkûr iki yüz elli esedî guruşu müdde‘î-i mezbûr İbrahim Ağa’ya edâ ve teslîme mezbûr İbrahim Bey’e tenbîh birle mâ vaka‘a bi’t-taleb ketb olundu. Fi’l-yevmi’l-hâmis aşer min şehri Ramazâni’l-mübârek li sene ihdâ ve tis‘în ve elf. Şuhûdü’l-hâl: Hüseyin Beşe b. Receb Çukadâr, Mehmed b. Eyüb, Ali b. İslâm, Ali b. Abdullah.