Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 503 Hüküm no: 621 Orijinal metin no: [95b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Saime bt. Abdullah’ın evini küçük oğlunun vasîsi Mehmed Efendi b. Ahmed’e istiğlâl yoluylasatması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Evlice Baba mahallesi sâkinelerinden Saime bt. Abdullah nâm hâtun tarafından husûs-ı âti’l-beyânı ikrâra vekîli olup hasm-ı câhid-i şer‘î mahzarında mezbûreyi ma‘rifet-i şer‘iyye ile ârifân olan Osman b. Mehmed ve Mustafa Çelebi b. Mehmed nâm kimesneler şehâdetleriyle şer‘an vekâleti sâbite olan müvekkile-i mezbûrenin zevci Hüseyin Çelebi b. Ebûbekir nâm kimesne meclis-i şer‘-i şerîfde mahalle-i merkūme sükkânından olup kendi sulbî sagīr oğlu Musa’nın tesviye-i umûruna kıbel-i şer‘-i hatîrden mansûb vasî olan işbu râfi‘ü’l-kitâb Mehmed Efendi b. Ahmed mahzarında bi’l-vekâle ikrâr-ı tâm ve takrîr-i kelâm edip zevce-i müvekkile-i mezbûre Saime Hâtun silk-i mülkünde münselik olup mahalle-i mezbûrede vâki‘ bir tarafdan Hayyât Mehmed Çelebi mülkü ve bir tarafdan sayacı Mahmud mülkü ve bir tarafdan ba‘zan Sâliha Hâtun mülkü ve ba‘zan Hasan Beşe veresesi mülkleri ve ba‘zan Halil Bey mülkü ve bir tarafdan tarîk-i âm ile mahdûd menzilimi cemî‘ tevâbi‘i ve levâhıkı ile vasî-i mezbûr Mehmed Efendi’ye altmış kıt‘a esedî guruşa bi tarîki’l-istiğlâl bey‘ ve teslîm ol dahi sagīr-i mezbûr malıyla tarîk-i mezkûr üzre iştirâ ve tesellüm ve kabûl eyleyip semeni olan meblağ-ı mezbûr altmış guruşu vasiyy-i mezbûr yedinden tamâmen ahz ve kabz eylediğimden sonra yine vasiyy-i mezbûr menzil-i mahdûd-ı mezkûrı târih-i kitâbdan her senesi dokuz esedî guruşdan üç sene tamâmına değin cem‘an yirmi yedi guruş ücret ile bana îcâr ve teslîm ben dahi minvâl-i muharrer üzre istîcâr ve tesellüm ve kabûl eyledim dedi dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer min şehri Ramazâni’l-mübârek li sene ihdâ ve tis‘în ve elf. Şuhûdü’l-hâl: Halil Bey b. Hasan, İbrahim Çelebi b. Mustafa, Ali Çavuş b. Mehmed, Abdi b. Mehmed, Mehmed b. Eyüb.