Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 504 Hüküm no: 622 Orijinal metin no: [95b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Bakkal Dimo’nun vârisinin kardeşi Yorgi v. Franko olduğunun tespiti Vilâyet-i Rumeli’nde Gerbeniş kazâsına tâbi‘ Nostimo nâm karye ahâlîsinden işbu râfi‘ü’r-rakīm Yorgi v. Franko nâm zimmî meclis-i şer‘-i şerîf-i enverde Hazret-i Ebâ Eyyûb el-Ensârî evkāfı’na bi’l-fi‘l mütevellî olan fahrü’l-akrân Yusuf Ağa tarafından husûs-ı âti’z-zikre vekîl-i sâbitü’l-vekâlesi olup hazret-i müşârün-ileyh evkāfına hâsıl kayd olan beytülmâlin emîni olan Ahmed Çelebi b. Mehmed mahzarında üzerine da‘vâ ve takrîr-i kelâm edip medîne-i mezbûre mahallâtından Nişancı Paşa mahallesinde sâkin bakkal iken bundan esbak mürd olan Dimo nâm zimmînin ben li ebeveyn er karındaşı ve bi’l-inhisâr vârisi olup cemî‘ metrûkâtı bana âid olmuş iken emîn-i mezbûr Ahmed Çelebi mürd-i mezbûrun zâhirde vâris-i ma‘rûfu olmamak zu‘muyla metrûkâtına vaz‘[-ı yed] eder suâl olunup kasr-ı yedine ve bana teslîme tenbîh olunmak matlûbumdur dedikde gıbbe’s-suâl emîn-i mezbûr Ahmed Çelebi metrûkât-ı mürd-i mezbûra vaz‘-ı yedini ikrâr lâkin müdde‘î-i mezbûrun verâsetini inkâr edicek müdde‘î-i mezbûr Yorgi’den da‘vâsına mutâbık beyyine taleb olundukda udûl-i ricâlden mahalle-i mezbûre Nişancı mahallesinden olup karye-i mezbûra karîb Mızrak nâm karye[de] sipâhi olan Mehmed Bey b. Kemnaş? nâm kimesne ile karye-i mezbûre Nostimo sükkânından Kara Yani v. Dimo nâm zimmî li ecli’ş-şehâde makām-ı kazâya hâzırân olup istişhâd olunduklarında fi’l-vâki‘ müdde‘î-i mezbûr Yorgi mezbûr Dimo’nun li ebeveyn er karındaşı ve bi’l-inhisâr vârisi olup babaları adı Frankova ve dedeleri adı Papa Nikola ve anaları adı Franko bt. Dimo ve maskat-ı re’sleri karye-i mezbûredir cemî‘ metrûkâtı müdde‘î-i mezbûr Yorgi’ye münhasıradır bundan gayrı vâris-i ma‘rûfu olduğu ma‘lûmumuz değildir biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylelediklerinde gıbbe’t-ta‘dîl ve’t-tezkiyye şehâdetleri makbûle olmağın mûcebiyle müdde‘î-i mezbûrun verâsetini hükm ve ber mûceb-i defter vaz‘ eylediği metrûkâtı müdde‘î-i mezbûra teslîme emîn-i mezbûr Ahmed Çelebi’ye tenbîh birle mâ vaka‘a bi’t-taleb ketb olundu. Fi’l-yevmi’s-sâbi‘ aşer [min şehr-i Ramazâni’l-mübârek] fi’s-seneti’l-mezbûr. Şuhûdü’l-hâl: Mehmed Beşe b. ( ) Pazarbaşı, Mehmed b. Eyüb, Hüseyin b. Ali, Ali b. İslâm, Mustafa Efendi.