Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 509 Hüküm no: 629 Orijinal metin no: [96b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rabia bt. Nezir Usta’nın evini Ali Bey b. Ömer’e satması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Davud Ağa mahallesi sâkinelerinden Râbia bt. Nezir Usta nâm hâtunun vâlidesi ve tarafından husûs-ı âti’l-beyânı ikrâra vekîli olup hasm-ı câhid-i şer‘î mahzarında mezbûrenin zâtını ma‘rifet-i şer‘iyye ile ârifân olan Mehmed Çelebi b. Mustafa ve Mustafa b. Ali nâm kimesneler şehâdetleriyle şer‘an vekâleti sâbite olan Âişe bt. Yusuf nâm hâtun meclis-i şer‘-i hatîr-i lâzımü’t-tevkīrde işbu râfi‘ü’l-kitâb Ali Bey b. Ömer nâm kimesne mahzarında bi’l-vekâle ikrâr-ı tâmm ve takrîr-i kelâm edip sadriye kızım müvekkile-i merkūme Râbia akd-i âti’z-zikrin sudûruna değin silk-i mülk-i sahîhimde münselik olup mahalle-i mezbûrede vâki‘ bir tarafdan İmâm Hasan Efendi mülkü ve bir tarafdan ba‘zan imâma meşrûta menzil ve ba‘zan müezzine meşrûta menzil ve bir tarafdan ba‘zan Çâşnigirzâde Âişe Hâtun mülkü ve ba‘zan bezzâzistânî İbrahim Çelebi mülkü ve ba‘zan Ali Çelebi’ye meşrûta vakf menzil ve bir tarafdan tarîk-i âm ile mahdûd olup dâhiliyyesinde bir fevkānî oda ve bir sofa ve tahta-pûş ve kiler ve kenîfi ve tahtânî bir oda ve matbah ve bi’r-i mâ ve kenîf ve bahçeyi ve hâriciyyesinde bir fevkānî oda ve tahtında ahır ve kenîfi müştemil menzilini cemî‘ tevâbi‘ ve levâhıkı ile mezbûr Ali Bey’e dört yüz kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi ber vech-i muharrer iştirâ ve tesellüm ve kabûl eyledikden sonra semeni olan meblağ-ı mezkûr dört yüz esedî guruşu mezbûr Ali Bey yedinden bi’t-tamâm ahz ve kabz eyledim ba‘de’l-yevm menzil-i mahdûd-ı mezkûrda vechen mine’l-vücûh alâka ve medhalim kalmadı mezbûr Ali Bey’in mülk-i müşterâsıdır keyfe mâ yeşâ’ ve yahtâr mutasarrıf olsun dedi dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min şehri Ramazâni’l-mübârek li sene ihdâ ve tis‘în ve elf. Şuhûdü’l-hâl: Hasan Efendi el-İmâm, Nasuh Efendi el-Müezzin, Abdülkādir Beşe b. Yusuf, İbrahim Çelebi b. Mehmed, Hüseyin Beşe b. Receb, Hüseyin Çelebi b. Ali, Abdullah Çelebi b. Hasan Efendi, Ahmed b. Hasan, Mustafa Beşe b. Hüseyin Hallâc.