Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 510 Hüküm no: 630 Orijinal metin no: [97a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kirana bt. Mihal’in evini Papa Şerafim v. Vasiliko’ya satması Havâss-ı Aliyye kazâsı a‘mâlinden Ereğli kasabası mahallâtından Metrepolid mahalle[si] sâkinelerinden Kirana bt. Mihal nâm nasrâniyye meclis-i şer‘-i şerîfde işbu râfi‘ü’s-sifr Papa Şerafim v. Vasiliko nâm zimmî muvâcehesinde ikrâr ve takrîr-i kelâm edip akd-i âtî sudûruna değin yedimde mülküm ve hakkım olup mahalle-i mezbûrede vâki‘ bir tarafı Todori v. Yani zimmî mülkü ve bir tarafı Aleksandri v. Dekyanoz zimmî mülkü ve iki tarafı tarîk-i âm ile mahdûd bir bâb fevkānî ve bir bâb tahtânî odalar ve bir dip dut ağacı ve havluyu müştemil olup bundan akdem zevcim Niyor v. Duka nâm zimmîden semen-i ma‘lûme iştirâ eylediğim mülk menzilimi cemî‘ tevâbi‘i ile mezbûr Papa Şerafim’e dört bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi minvâl-i muharrer üzre iştirâ ve tesellüm ve kabûl eyleyip semeni olan meblağ-ı mezbûr dört bin akçeyi müşterî-i mezbûr yedinden tamâmen ahz ve kabz eyledim ba‘de’l-yevm menzil-i mahdûd-ı mezkûrda vechen mine’l-vücûh alâka ve medhalim yokdur mezbûr Papa Şerafim’in mülk-i müşterâsı olmuşdur keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâdis ve’l-ışrîn min şehri Ramazâni’l-mübârek li sene ihdâ ve tis‘în ve elf. Şuhûdü’l-hâl: Hüseyin b. Ali, Mehmed b. Eyüb, Ali b. İslâm, Ali b. Abdullah, Yani [v.] Franko, Manol [v.] Kostantin, Dimitri [v.] Kalave, Yorgi [v.] Yoryo?.