Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 513 Hüküm no: 636 Orijinal metin no: [97b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Ağa b. Hüseyin’in menzil, bostan, çiftlik ve tarlalarını Hüseyin Ağa b. Hüseyin Ağa’ya satması Husûs-ı âti’l-beyânın mahallinde ketb ve tahrîri iltimâs olunmağın savb-ı şer‘-i hatîrden mevlânâ Mehmed Efendi b. Nasuh irsâl olunup ol dahi Havâss-ı Aliyye kazâsı a‘mâlinden Küçükçekmece nâhiyesine tâbi‘ Küçüknakkaş nâm karyede vâki‘ zikr-i âtî menzile varıp zeyl-i kitâbda muharrerü’l-esâmî müslimîn huzûrunda akd-i meclis-i şer‘-i mübîn eyledikde karye-i mezkûre sükkânından Mustafa Ağa b. Hüseyin nâm kimesne meclis-i ma‘kūd-ı mezkûrda işbu kitâb-ı sıhhat-nisâbın sâhibi olup düstûr-ı ekrem müşîr-i efham nizâmü’l-âlem muslih-i mesâlih-i benî âdem devletlü ve sa‘âdetlü sadr-ı âlî hazretlerinin yeğeni olan iftihârü’l-emâcid ve’l-ekârim câmi‘ü’l-mehâmid ve’l-mekârim zü’l-kadri’r-refî‘ ve’l-câhi’l-menî‘ sa‘âdetlü Hüseyin Ağa b. Hüseyin Ağa hazretleri taraf-ı bâhirü’ş-şereflerinden husûs-ı âti’z-zikre vekîl olup nehc-i şer‘î ve tarîk-i mer‘î üzre vekâleti şer‘an sâbite olan fahrü’l-eşbâh Hüseyin Ağa b. Abbas mahzarında bi’t-tav‘i’s-sâf ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olup karye-i mezbûrede vâki‘ bir tarafdan Hüseyin Paşazâde mülkü ve bir tarafdan deryâ ve bir tarafdan tarîk-i âm ile mahdûd olup etrâf-ı erba‘ası dehlizli bir köşk ve altında iki oda ve bir salonlu ve bir camekânlı hamamı ve bir tahtânî oda ve bir sofayı ve bir matbah ve bir fırın ve kenîf ve birinin üstünde ve birinin yanında ocaklı oda iki çatma anbarı ve nısfı ahır samanlığı ve bir öküz ahırı ve iki ırgad odası ve bir tokat ve bir su kuyusu ve bir mikdâr arsa ve bahçe ve altı dönüm bir kıt‘a bağı ve muttasıl iki dönüm enâr bahçesi ve tahmînen beş keyl tohum alır eşcâr-ı müsmireyi hâvî bahçeyi müştemil mülk menzilde olan nısf hisse-i şâyi‘amı bi cümleti’t-tevâbi‘ ve’l-levâhık ve menzil-i mezkûr kurbunda vâki‘ merhûm ve mağfûrun-leh Sultan Bayezid Hân-ı Velî hazretleri evkāfına senede yüz otuz iki akçe mukāta‘ası olup iki tarafı hanım tarlası ve bir tarafı Mustafa Çelebi tarlası ve bir tarafı deryâ ile mahdûd bir dolap kapısını hâvî bir lahana bostanında olan nısf hisse-i şâyi‘amı dahi ve benim kendi mülküm olup menzil-i mezkûrda mevcûd beş re’s kara sığır öküzü ve altı re’s inek ve dört re’s buzağı ve altmış keyl buğday ve elli keyl alef ve kırk keyl şa‘îr ve yirmi keyl kaplıca ve on beş keyl burçak ve otuz çit saman ve bir büyük ve dört aded küçük saban demiri âlâtıyla ve iki mükemmel araba ve üç döğen tahtası ve beş bel ve altı çapa ve bir demir tarak ve bir balta ve bir çalı tırpanı ve bir otluk tırpanı ve yedi aded burgu ve iki yularlı keser ve bir destere ve bir el değirmeni ve üç fıçı ve bir ekmek teknesi ve iki gürz ve bir kebîr kantar ve iki demir şiş ve bir kelberi ve bir atla ve bir bukağımı müvekkil-i mûmâ-ileyh Hüseyin Ağa’ya altı yüz kıt‘a esedî guruşa bi safkatin vâhide tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ve temlîk edip vekîl-i mezbûr dahi iştirâ ve tesellüm ve temellük ve kabûl eyledikden sonra yine merkūm-ı müşârün-ileyh evkāfından olup karye-i mezbûre sınırı dâhilinde vâki‘ İncepâre demekle ma‘rûf bir tarafı Mustafa Çelebi tarlası ve bir tarafı İbrahim tarlası ve bir tarafı deryâ ve bir tarafı tarîk-i âm ile mahdûd bir kıt‘a tarla ve kurbunda vâki‘ bir tarafı hanım tarlası ve bir tarafı deryâ ve bir tarafı Mustafa Çelebi tarlası ve bir tarafı tarîk-i âm ile mahdûd bir kıt‘a tarla ve yine bir tarafı umdetü’l-muhadderât Beyhan Sultan tarlası ve bir tarafı sazlık ve bir tarafı hanım tarlası ve bir tarafı tarîk-i âm ile mahdûd tahmînen otuz keyl tohum istî‘âb eder bir kıt‘a tarla ve yine mezarlık üstünde Keylik? demekle ma‘rûf bir kıt‘a tarla ve yine Kartaltepe demekle ma‘rûf mevzi‘de bir kıt‘a tarla ve Soğuksu nâm mahalde bir kıt‘a tarla ve Hünkâryolu altında bir kıt‘a tarla ki cem‘an yedi kıt‘a tarlalarımın dahi hakk-ı tasarruflarını ma‘rifet-i sâhib-i arz ile müvekkil-i mûmâ-ileyh Hüseyin Ağa hazretlerine iki yüz kıt‘a esedî guruş bedel mukābelesinde tefvîz ve ferâğ edip vekîl-i mezbûr Hüseyin Ağa dahi ber vech-i muharrer tefevvuz ve kabûl eyledikden sonra semen-i mezbûr ile bedel-i mezkûrun cem‘an sekiz yüz esedî guruşu [98a] vekîl-i mezbûr yedinden bi’t-tamâm ahz ve kabz eyledim ba‘de’l-yevm emlâk-i mezbûre ile arâzi-i merkūmede alâkam kalmadı müvekkil-i mezbûr keyfe mâ yeşâ’ mutasarrıf olup tarlaları dahi emsâli gibi tasarruf eylesin dedikde vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Hasan Beşe b. Receb ve Mehmed b. Eyüb ile meclis-i şer‘a gelip her biri alâ vukū‘ihi inhâ ve takrîr etmeleriyle mâ vaka‘a bi’t-taleb ketb olundu. Fi’l-yevmi’s-sâlis min Şevvâli’l-mükerrem li sene ihdâ ve tis‘în ve elf. Şuhûdü’l-hâl: Solakzâde El-Hâc Mehmed Çelebi b. Hüseyin, Zülfikār b. Mustafa, Ahmed Halîfe b. Ali el-İmâm, Mustafa Beşe b. Mehmed, Osman b. Ahmed, Ali b. Abdülkādir, Ahmed Çelebi b. ( ) Çukadâr, Mustafa Çelebi el-İmâm.