Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 517 Hüküm no: 642 Orijinal metin no: [98b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kayıp Ramazan b. Ali Beşe üzerine bakıma muhtaç babası için nafaka takdiri Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî- mahallâtından Nişancı Paşa mahallesi sükkânından işbu râfi‘ü’l-kitâb Ali Beşe b. Mehmed nâm kimesne meclis-i şer‘-i şerîfde takrîr-i kelâm ve ta‘bîr ani’l-merâm edip ben pîr-i fânî ve alîlü’l-mizâc ve kâr u kisbe iktidârım olmamağla sulbî kebîr oğlum gāib ani’l-meclis Ramazan nâm kimesne üzerine kadr-i kifâye bana nafaka ve kisve bahâ takdîr olunmak matlûbumdur dedikde hâkim-i muvakki‘-i sadr-ı kitâb tûbâ-lehû ve hüsnü me’âb hazretleri dahi mezbûr Ali Beşe’nin nafaka ve kisve-bahâsı için oğlu merkūm Ramazan üzerine târih-i kitâbdan yevmî sekiz akçe farz ve takdîr edip meblağ-ı mefrûz-ı mezkûrı harc ve sarfa ve lede’l-hâce istidâneye ve vakt-i zaferde merkūm Ramazan’a rücû‘a izin birle mâ vaka‘a gıbbe’t-taleb ketb olundu. Fî gurreti Şevvâli’l-mükerrem li sene ihdâ ve tis‘în ve elf. Şuhûdü’l-hâl: Nasuh Efendi b. Abdullah, Hüseyin Çelebi b. Ali, Mehmed b. Eyüb, Yusuf b. Abdullah.