Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 518 Hüküm no: 643 Orijinal metin no: [98b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Evliya’nın alacağını kefil Ömer Beşe b. Abdullah’tan tahsil ettiği Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Kiremitçi Süleyman mahallesi sâkinelerinden Fâtıma bt. Evliyâ nâm hâtun meclis-i şer‘-i hatîr-i lâzımü’t-tevkīrde işbu râfi‘ü’r-rakīm Mano v. ( ) nâm zimmî muvâcehesinde bi tav‘ihâ ikrâr-ı tâm ve takrîr-i kelâm edip merkūm Mano zimmetinde cihet-i deyn-i şer‘îden yedi bin iki yüz akçe hakkım olmağla meblağ-ı mezkûrun dört bin akçesini zimmetimde lâzımü’l-edâ deynim olan hâzır bi’l-meclis Ömer Beşe b. Abdullah nâm kimesne üçümüz bir meclisde iken havâle-i sahîha-i şer‘iyye ile havâle edip ol dahi havâle-i mezkûreyi ba‘de’l-kabûl meblağ-ı bâkī üç bin iki yüz akçeye dahi merkūm Ömer Beşe kefîl ve zâmin olmağın kefâletine binâen meblağ-ı bâkī-i mezkûr üç bin iki yüz akçeyi mezbûr Ömer Beşe tamâmen bana edâ ve teslîm ben dahi ahz ve kabz eyledim ba‘de’l-yevm meblağ-ı merkūm yedi bin iki yüz akçeden merkūmân Mano ve Ömer Beşe zimmetlerinde bir akçe ve bir habbe hakkım kalmadı meblağ-ı mastûr yedi bin akçeye müte‘allika da‘vâdan ibrâ-i âmm-ı kātı‘ü’n-nizâ‘la mezbûrân Mano ve Ömer Beşe’nin zimmetlerini ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min şehr-i Ramazâni’l-mübârek li sene ihdâ ve tis‘în ve elf. Şuhûdü’l-hâl: Hüseyin Beşe b. Receb, Mehmed b. Eyüb, Ali b. Abdullah, Yusuf [b.] Abdullah.