Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 518 Hüküm no: 644 Orijinal metin no: [99a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zeynep Hatun bt. İbrahim’in cariyesi Fâtıma bt. Abdullah’ı azat etmesi Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî- mahallâtından Zeyneb Hâtu[n] bt. İbrahim nâm kimesne tarafından akd-i âti’l-beyânı ikrâra vekîl olup hasm-ı câhid-i şer‘î muvâcehesinde Hasan b. Murad ve Şâhin b. Bâli nâm kimesneler şehâdetleri ile şer‘an vekâleti sâbite olan Seydî Beşe b. Hüseyin nâm kimesne meclis-i şer‘-i hatîr-i lâzımü’t-tevkīrde müvekkil-i mezbûr Mustafa Beşe’nin kendiye rıkkını mu‘terife olup işbu orta boylu, açık kaşlı, gök elâ gözlü Lehviyyetü’l-asl bâ‘isetü’l-kitâb Fâtıma bt. Abdullah nâm câriye-i memlûkesi mahzarında bi’l-vekâle ikrâr-ı tâmm ve takrîr-i kelâm edip müvekkilim mezbûr Mustafa Beşe câriye-i mevsûfe-i merkūme Fâtıma’yı cemî‘ malından ifrâz edip hasbeten lillâhi’l-ganiyyi’l-hallâk i‘tâk ve tahrîr-i zümre-i harâir-i asliyyâta idrâc ve ilhâk eyleyip min ba‘d mevsûfe-i mezbûre Fâtıma sâir harâir-i asliyyât gibi hürre olup üzerinde hakk-ı velâdan gayrı hakkım kalmadı dedi dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min Şevvâli’l-mükerrem li sene ihdâ ve tis‘în ve elf. Şuhûdü’l-hâl: Nasuh Efendi b. Abdüsselâm, Hüseyin Beşe b. Receb Çukadâr, Ali b. Hüseyin, Himmet b. Ali, Hüseyin b. Murad, Hüseyin b. Mustafa, Mehmed b. Eyüb, Yusuf [b.] Abdullah.