Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 519 Hüküm no: 645 Orijinal metin no: [99a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Diyale bt. Kolo’nun miras hissesi davasında Decko v. Yano ile sulh olmaları Vilâyet-i Rumeli’nde Premedi kazâsına tâbi‘ Bostan nâm karye sâkinelerinden Diyale bt. Kolo nâm nasrâniyyenin sadrî kebîr oğlu ve tarafından sulh ve ibrâ-i âti’l-beyânı ikrâra vekîli olup hasm-ı câhid-i şer‘î muvâcehesinde Yanko v. Niko ve Kirko v. Yanko nâm zimmîler şehâdetleriyle şer‘an vekâleti sâbite olan Kolo v. Kozi nâm zimmî meclis-i şer‘-i hatîr-i lâzımü’t-tevkīrde işbu râfi‘ü’r-rakīm Decko v. Yano nâm zimmî muvâcehesinde bi’l-vekâle ikrâr-ı tâmm ve takrîr-i kelâm edip anam müvekkile-i merkūme Diyale’nin zevci olup bundan akdem mürd olan Yano v. Niko nâm hâlikin metrûkâtına mersûm Decko vaz‘-ı yed etmekle anam müvekkile-i merkūme Diyale tereke-i hâlik-i mezbûrdan rub‘ hisse-i irsiyyesini mersûm Decko’dan taleb ve da‘vâ eyledikde ol dahi tereke-i mezbûreye vaz‘-ı yedini ikrâr lâkin rub‘ hisse-i mezkûresini vermede te‘allül ve nizâ‘ etmeğin beynlerinde münâza‘ât-ı kesîre ve muhâsamât-ı ekîde vâkı‘a olmuş idi el-hâletü hâzihî beynlerinde muslihûn tavassut edip mesfûr Decko ile anam müvekkile-i merkūmeyi altı yüz akçe üzerine rub‘ hisse-i mezbûre da‘vâsından inşâ-i akd-i sulh eylelediklerinde anam merkūme Diyale dahi sulh-ı mezbûru kabûl ve bedel-i sulh olan meblağ-ı mezbûr altı yüz akçeyi mersûm Decko yedinden tamâmen ahz ve kabz edip hâlik-i mezbûrun metrûkâtından rub‘ hisse-i mezbûresine müte‘allika da‘vâdan mersûm Decko’nun zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedi dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min Şevvâli’l-mükerrem fi’s-seneti’l-mezbûr. Şuhûdü’l-hâl: İbrahim Beşe b. Abdullah, Mehmed b. Eyüb, Yusuf b. Abdullah, Miyolo [v.] Yanko, Kino [v.] Kika, Pano [v.] Minho, Minho [v.] Beço, Mano [v.] Sermo.