Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 520 Hüküm no: 646 Orijinal metin no: [99a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aleksi v. Nikola’nın kölesi Maksim’i azat etmesi Mahmiye-i İstanbul hısnı ebvâbından Fenerkapısı hâricinde Karabaş mahallesi ahâlîsinden Aleksi v. Nikola nâm zimmî tarafından ıtk-ı âti’l-beyânı ikrâra vekîl olup hasm-ı câhid muvâcehesinde Kirkor v. Yani ve Dimo v. Yani nâm zimmîler şehâdetleriyle şer‘an vekâleti sâbite olan Yazıcı Yamandi v. Apostol nâm zimmî meclis-i şer‘-i şerîfde müvekkil-i mesfûra rıkkını mu‘terif uzun boylu, gök elâ gözlü, açık kaşlı Rûsiyyü’l-asl râfi‘ü’r-rakīm Maksim v. Yuvan nâm zimmî muvâcehesinde bi’l-vekâle ikrâr-ı tâmm ve takrîr-i kelâm edip müvekkil-i mezbûr Aleksi abd-i memlûkü olan mevsûf-ı merkūm Maksim’i cemî‘ malından ifrâz edip lâ li ivaz ‘âcil ve lâ li garaz âcil i‘tâk ve tahrîr ve zümre-i ahrâr-ı asliyyîne idrâc ve ilhâk edip min ba‘d sâir ahrâr-ı asliyyîn gibi hür olup üzerinde hakk-ı velâdan gayri hakkım kalmadı dedi dedikde mâ hüve’l-vâki‘ gıbbe’t-taleb ketb olundu. Fî 8 min Şevvâl sene [10]91. Şuhûdü’l-hâl: Nasuh Efendi, Hakkı Efendi b. Ahmed, Hasan Beşe b. Receb, Abdülvâhid Çelebi el-Müezzin, Yorgi, Diğer Yorgi, Tanaş [v.] Yani.