Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 521 Hüküm no: 648 Orijinal metin no: [99a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aleksi v. Nikola’nın cariyesi Anna’yı azat etmesi Mahmiye-i İstanbul hısnı ebvâbından Fenerkapısı hâricinde Karabaş mahallesi ahâlîsinden Aleksi v. Nikola nâm zimmî tarafından ıtk-ı âti’l-beyânı ikrâra vekîl olup hasm-ı câhid muvâcehesinde Kirkor v. Yani ve Dimo v. Yani nâm zimmîler şehâdetleriyle şer‘an vekâleti sâbite olan Yamandi v. Apostol nâm zimmî meclis-i şer‘-i hatîr-i lâzımü’t-tevkīrde müvekkil-i mezbûre rıkkını mu‘terife olup işbu orta boylu, açık kaşlı, sarı elâ gözlü, sarışın Rûsiyyetü’l-asl bâ‘isetü’l-vesîka Anna bt. Filib nâm câriye-i memlûkesi muvâcehesinde bi’l-vekâle ikrâr-ı tâm ve takrîr-i kelâm edip müvekkilem merkūme Aleksi câriye-i mevsûfe-i mezkûre Anna’yı cemî‘ malından ifrâz edip [99b] lâ li ivaz ‘âcil ve lâ li garazin âcil i‘tâk ve tahrîr ve zümre-i ahrâr-ı asliyyâta idrâc ve ilhâk edip min ba‘d mevsûf-ı merkūma Anna sâir harâir-i asliyyât gibi hürre olup üzerinde hakk-ı velâdan gayri hakkım kalmadı dedi dedikde mâ hüve’l-vâki‘ bi’t-taleb ketb olundu. Fi’l-yevmi’s-sânî min Şevvâli’l-mükerrem li sene ihdâ ve tis‘în ve elf. Şuhûdü’l-hâl: Nasuh Efendi b. Abdüsselâm, Hüseyin Efendi b. Ahmed, Abdülvâhid Çelebi b. ( ) el-Medenî, Hüseyin Beşe b. Receb, Yorgi, diğer Yorgi, Tanaş [v.] Yani.