Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 521 Hüküm no: 649 Orijinal metin no: [99b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Paşa’nın eski kethüdası Hasan Ağa’nın menzil hissesini Haseki Sultan kethüdası Hızır Ağa’ya satıp bazı emlâkinin de kullanım hakkını devretmesi Husûs-ı âti’l-beyânın mahallinde ketb ve tahrîr[-i] iltimâs olunmağın savb-ı şer‘-i hatîrden mevlânâ Mehmed Efendi b. Nasuh irsâl olunup ol dahi düstûr-ı mükerrem müşîr-i müfahham vezîr-i sânî müsâhib-i şehriyârî devletlü ve sa‘âdetlü Mustafa Paşa hazretlerinin sâbıkan kethüdâları olup medîne-i Hazret-i Ebâ Eyyûb-i Ensârî’de Servi mahallesi sâkinlerinden olan mefharü’l-emâcid ve’l-akrân Hasan Ağa b. Mehmed Efendi’nin menziline varıp zeyl-i kitâbda muharrerü’l-esâmî müslimîn huzûrunda akd-i meclis-i şer‘-i mübîn eyledikde mûmâ-ileyh Hasan Ağa meclis-i ma‘kūd-ı mezkûrda işbu kitâb-ı sıhhat-nisâbın sâhibi olup umdetü’l-muhadderât zübdetü’l-muvakkarât tâcü’l-mestûrât aliyyetü’z-zât safiyyetü’s-sıfât devletlü ve sa‘âdetlü Haseki Sultan hazretlerinin kethüdâları olan iftihârü’l-emâcid ve’l-ekârim câmi‘ü’l-mehâmid ve’l-mekârim zû’l-kadri’r-refî‘ ve’l-câhi’l-menî‘ izzetlü Hızır Ağa b. ( ) taraf-ı bâhirü’ş-şereflerinden ikrâr-ı âti’z-zikri tasdîke vekîl-i sâbitü’l-vekâleleri Yusuf Ağa b. Ali mahzarında bi’t-tav‘i’s-sâf ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülkümde münselik olup medîne-i mezbûre tevâbi‘inden kasaba-i Çatalca’da vâki‘ bir tarafdan kiremithâne ve bir tarafdan kefere mahallesi ve bir tarafdan ayazma ve bir tarafdan tarîk-i âm ile mahdûd olup muhavvata-i hâriciyyesi iki bâb tahtânî oda ve iki ahırı ve bir samanlığı ve bir sığır tokatı ve iki anbarı ve mâ-i cârîyi ve bostan yeri ve zât-ı eşcâr-ı müsmire ve gayr-ı müsmire bahçeyi ve muhavvata-i dâhiliyyesi iki bâb tahtânî ve bir fevkānî odaları ve bir sofa ve dehliz ve fırını ve iki anbarı ve havuzu müştemil menzilde olan on iki sehimden dokuz sehim hisse-i şâyi‘amı bi cümleti’t-tevâbi‘ ve’l-levâhık müvekkil-i mûmâ-ileyh Hızır Ağa hazretlerine iki yüz esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ve temlîk ol dahi minvâl-i muharrer üzre iştirâ ve tesellüm ve temellük ve kabûl eyledikden sonra yine silk-i mülkümde münselik olup menzil-i mezkûrda mevcûd bir camus öküzü ve sekiz re’s kara sığır öküzü ve üç camus ineği ve bir camus düğesi ve iki kara sığır ineği ve bir buzağı ve bir bârgir ve bir kısrak ve keyl-i veznî beynimizde ma‘lûm mezrû‘ ve gayr-ı mezrû‘ buğday ve arpa ve alef ve burçak ile sâir esâs-ı beyt ve evânî-i nühâsiyye ve gayr-ı nühâsiyyemi bi safkatin vâhidetin bin kıt‘a esedî guruşa bey‘-i kat‘î ile bey‘ ve teslîm ve temlîk ol dahi ber vech-i muharrer iştirâ ve tesellüm ve temellük ve kabûl eyledikden sonra tefvîz-i âtî sudûruna değin taht-ı tasarrufumda olup merkūm Mahmud Paşa vakfı’ndan kasaba-i merkūmede menzil-i mezkûr kurbunda vâki‘ ma‘lûmü’l-hudûd bir kıt‘a bostan yeri ile hadîka-i hâssa kurbunda vâki‘ Manisalı Çelebi bostanı demekle ma‘rûf bir kıt‘a bostan ile lede’l-ahâlî ma‘lûmü’l-hudûd ve’l-kıta‘ tarlalarımın dahi hakk-ı tasarruflarını ma‘rifet-i sâhib-i arz ile müvekkil-i müşârün-ileyh Hızır Ağa hazretlerine altı yüz esedî guruş bedel mukābelesinde tefvîz ve ferâğ edip ol dahi minvâl-i muharrer üzre tefevvuz ve kabûl eyledikden sonra meblağayn-ı mezkûreyn ile bedel-i merkūme ki cem‘an bin sekiz yüz esedî guruş müvekkil-i mûmâ-ileyh Hızır Ağa hazretleri yedinden bi’t-tamâm ve’l-kemâl ahz ve kabz eyledim ba‘de’l-yevm menzil-i mezkûrda olan dokuz sehim hisse-i şâyi‘am ile emlâk-i merkūmede vechen mine’l-vücûh alâkam kalmadı müvekkil-i müşârün-ileyh Hızır Ağa hazretleri keyfe mâ yeşâ’ ve hasbe mâ yahtâr mutasarrıf olup arâzi-i mersûmeyi dahi emsâli gibi tasarruf eylesin dedikde vâki‘ hâli gıbbe’t-tasdîki’ş-şer‘î mevlânâ-yı mezbûr mahallinde tahrîr ba‘dehû ma‘an irsâl olunan El-Hâc Hasan b. Ali ve Mehmed b. Eyüb nâm kimesneler ile meclis-i şer‘a gelip alâ vukū‘ihi her biri inhâ ve takrîr etmeğin mâ hüve’l-vâki‘ gıbbe’t-taleb ketb olundu. Fi’l-yevmi’t-tâsi‘ min Şevvâli’l-mükerrem li sene ihdâ ve tis‘în ve elf. Şuhûdü’l-hâl: Mustafa Çelebi b. Pervâne, Mahmud b. Ali, Mehmed b. Eyüb, El-Hâc Hasan b. Ali, el-Hâc Mustafa b. Hüseyin