Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 522 Hüküm no: 650 Orijinal metin no: [99b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. Mehmed’in evini Rabia bt. Abdullah’a satması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından İslâm Bey mahallesi sâkinelerinden Sâliha bt. Mehmed nâm hâtun meclis-i şer‘-i hatîr-i lâzımü’t-tevkīrde işbu râfi‘atü’l-kitâb Râbia bt. Abdullah nâm hâtun mahzarında bi tav‘ihâ ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülkümde münselik olup mahalle-i mezbûrede vâki‘ bir tarafdan ba‘zan hammâmî el-Hâc Mustafa mülkü ve ba‘zan tarîk-i âm ve üç tarafdan Kasım Beşe mülkü ile mahdûd bir fevkānî ve bir tahtânî odaları ve tûlen ve arzen bi hesâb-ı terbî‘î dört yüz zirâ‘ arsayı hâvî mülk menzilimi bi cümleti’t-tevâbi‘ ve’l-levâhık merkūme Râbia Hâtun’a otuz kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ve temlîk ol dahi minvâl-i muharrer üzre iştirâ ve tesellüm ve temellük ve kabûl eyledikden sonra semeni olan meblağ-ı mezkûr otuz üç guruşu mersûme Râbia Hâtun yedinden tamâmen ahz ve kabz eyledim ba‘de’l-yevm menzil-i mahdûd-ı mezkûr merkūme Râbia Hâtun’un mülk-i müşterâsı olmuşdur keyfe mâ yeşâ’ ve yahtâr mutasarrıfe olsun dedikde gıbbe’t-tasdîk mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ min Şevvâli’l-mükerrem li sene ihdâ ve tis‘în ve elf. Şuhûdü’l-hâl: Es-Seyyid Abdurrahman Efendi b. es-Seyyid Yakub el-İmâm, Abdülkādir Bey b. Ahmed Paşa, İbrahim Beşe b. Abdullah, Kasım Beşe b. Abdullah, Durmuş b. Şaban, İsmail b. Hacı Yusuf, Mehmed b. Eyüb, Mehmed [b.] Mahmud, Yusuf b. Abdullah.