Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 523 Hüküm no: 651 Orijinal metin no: [100a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mukabeleci Ali Efendi’nin binasını genişleten İstirati v. Anastaş’la harcama hususundaki davasının anlaşma ile sonuçlandığı Mi‘mâr tâifesinden İstirati v. Anastaş nâm zimmî meclis-i şer‘-i şerîf-i enverde işbu kitâb-ı sıhhat-nisâbın sâhibi olup atebe-i aliyyede bi’l-fi‘l mukābeleci olan umdetü erbâbi’t-tahrîr ve’l-kalem zübdetü ashâbi’t-tastîr ve’r-rakam izzetlü Ali Efendi b. Mustafa taraf-ı bâhirü’ş-şereflerinden ikrâr-ı âti’z-zikri tasdîke vekîl-i sâbitü’l-vekâleleri olan Mustafa Çelebi b. Mahmud mahzarında tav‘an ikrâr-ı tâm ve takrîr-i kelâm edip müvekkil-i mûmâ-ileyh Ali Efendi hazretlerinin medîne-i Hazret-i Ebâ Eyyûb-i Ensârî’de Otakçılar semtinde Mehmed Bey mahallesinde vâki‘ lede’l-ahâlî ma‘lûmü’l-hudûd mülk menzillerinde yine müvekkil-i mûmâ-ileyh Ali Efendi’nin emir ve izniyle bir fevkānî odayı ve sofayı tevsî‘ edip ve zirâ‘ı beynimizde ma‘lûm taş duvarı müceddeden binâ ve ba‘zı mevâzi‘ine harc ve sarf ettiğim akçede nizâ‘ etmekle ba‘dehû fermân-ı şerîf ile üzerine kıbel-i şer‘den nâib ve mi‘mâr varıp ba‘de’l-keşf ve’l-mesâha tahmîn ve takvîm ile harc ve sarf eylediğim akçe otuz dört bin üç yüz kırk beş akçeye bâliğ olmuşidi hâlâ meblağ-ı mezkûr otuz dört bin üç yüz kırk beş akçeyi müvekkil-i mûmâ-ileyh Ali Efendi hazretleri yedinden bi’t-tamâm ve’l-kemâl ahz ve kabz eyledim min ba‘d meblağ-ı mezkûrdan müvekkil-i müşârün-ileyh Ali Efendi hazretleri zimmetinde bir akçe ve bir habbe hakkım kalmadı dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin min Şevvâli’l-mükerrem li sene ihdâ ve tis‘în ve elf. Şuhûdü’l-hâl: İbrahim Ağa b. Şaban, Hacı İsmail b. Mustafa, Hacı Abdi b. Abdullah, Arslan Bey b. Rıdvan, Ali Bey b. Abdi, Ali Ağa b. Mahmud, Hüseyin Beşe b. Receb.