Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 524 Hüküm no: 652 Orijinal metin no: [100a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmihan bt. Abdullah’ın evini Beroket v. Yeli’ye satması Havâss-ı Aliyye kazâsına tâbi‘ Silivri kasabasında Yahudi mahallesi sâkinlerinden İsmihân bt. Abdullah nâm hâtun meclis-i şer‘-i hatîr-i lâzımü’t-tevkīrde râfi‘ü’r-rakīm Beroket v. Yeli nâm Yahudi mahzarında bi tav‘ihâ ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik olup mahalle-i mezbûrede vâki‘ bir tarafdan Mosi ve İlya nâm Yahudân mülklerine ve bir tarafdan Sarya nâm Yahudi bahçesi ve bir tarafdan Yuvan nâm zimmî mülkü ve bir tarafdan tarîk-i âm ile mahdûd bir bâb fevkānî oda ve bir tahtânî oda ve mahzen ve matbah ve çardak ve havluyu müştemil mülk menzilimi bi cümleti’t-tevâbi‘ ve’l-levâhık Beroket’e dört bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ve temlîk ol dahi minvâl-i muharrer üzre iştirâ ve temellük ve tesellüm ve kabûl eyledikden sonra semeni olan meblağ-ı mezkûr dört bin akçeyi mersûm Beroket yedinden tamâmen ahz ve kabz eyledim ba‘de’l-yevm menzil-i merkūm mesfûr Beroket’in mülk-i müşterâsı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ min Şevvâli’l-mükerrem li sene ihdâ ve tis‘în ve elf. Şuhûdü’l-hâl: Bağcı Mehmed Çavuş, es-Seyyid Mustafa Çelebi, Ali b. İsmail, Yusuf b. Abdullah, Yako v. Kili, Mahnam v. Yasef.