Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 524 Hüküm no: 653 Orijinal metin no: [100a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Abdullah’ın evini Bâzirgânbaşı İsmail Efendi Vakfı’na istiğlâl yoluylasatması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Şah Sultan mahallesinde sâkin Mehmed Çelebi b. Abdullah nâm kimesne meclis-i şer‘-i hatîr-i lâzımü’t-tevkīrde medîne-i mezbûrede vâki‘ merhûm Bâzirgânbaşı İsmail Efendi vakfı’na berât-ı âlîşân ile bi’l-fi‘l mütevellî olan işbu râfi‘ü’l-kitâb Mahmud Çelebi b. Receb mahzarında tâyi‘an ikrâr-ı tâm ve takrîr-i kelâm edip silk-i mülkümde münselik olup mahalle-i mezbûrede vâki‘ bir tarafdan Şerife Hâtun vakfı ve bir tarafdan Mustafa vakfı ve bir tarafdan tarîk-i hâs ve bir tarafdan tarîk-i âm ile mahdûd bir fevkānî ve bir tahtânî odaları ve bi’r-i mâyı ve kenîfi ve bahçeyi müştemil menzilimi cemî‘ hukūk ve merâfıkı ile mütevellî-i mezbûr Mahmud Çelebi’ye bi tarîki’l-istiğlâl yüz otuz kıt‘a esedî guruşa bey‘ ve teslîm ol dahi vakf-ı mezkûr malıyla tarîk-i merkūm üzre iştirâ ve tesellüm ve kabûl eyleyip semeni olan meblağ-ı mastûr yüz otuz guruşu mütevellî-i mezbûr yedinden tamâmen ahz ve kabz eylediğimden sonra yine mütevellî-i mezbûr Mahmud [menzil-i] mezkûru ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan her senesi on dokuz buçuk esedî guruş ücret ile üç sene tamâmına değin bana îcâr ve teslîm ben dahi minvâl-i muharrer üzre istîcâr ve tesellüm ve kabûl eyledim dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fî gurreti Şevvâli’l-mükerrem fi’s-seneti’l-mezbûre Şuhûdü’l-hâl: Fahrü’l-akrân Süleyman, Ömer Efendi b. İvaz, Şaban Bey Türbedâr, Abdülkādir Efendi el-İmâm, Abdullah Çelebi b. Şaban el-Kayyum, İbrahim Çelebi b. Yakub, Abdullah Çelebi b. Mustafa, Mustafa b. Şaban, es-Seyyid Abdurrahman b. ( ) Efendi el-İmâm, Yusuf Çelebi Berber, Ali el-Cündî.