Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 525 Hüküm no: 654 Orijinal metin no: [100a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. Bayram’ın mirası hususunda vârislerinin birbirleriyle anlaştıkları Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Takyecibaşı mahallesi sâkinelerinden iken bundan akdem fevt olan Emine bt. Bayram nâm müteveffâtın verâseti zevci Osman b. Mustafa’ya ve anası Âişe bt. Osman’a ve li ebeveyn er karındaşları Mehmed ve Mustafa ile kız karındaşları Fâtıma ve İsmihân’a münhasıra olduğu şer‘an zâhir ve müte‘ayyin oldukdan sonra mezbûrûn Mehmed ve Mustafa ve Âişe ve Fâtıma ve İsmihân meclis-i şer‘-i hatîr-i lâzımü’t-tevkīrde müteveffât-ı mezbûrenin muhallefâtına vâzı‘ü’l-yed işbu râfi‘ü’l-kitâb zevci mezbûr Osman mahzarında her biri tav‘an ikrâr-ı tâm ve takrîr-i kelâm edip mûrisemiz müteveffât-ı merkūme Emine’nin muhallefâtından her birimizin hisse-i irsiyyelerimize isâbet eden hakkımız müteveffât-ı merkūmenin terekesinden hisse-i şer‘iyyelerimize müte‘allik âmme-i da‘vâdan her birimiz âharın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-âşir min Şevvâli’l-mükerrem fi’s-seneti’l-mezbûre. Şuhûdü’l-hâl: Osman Ağa b. Ömer Efendi, Mustafa Çelebi b. Mehmed, Ali Çelebi b. Ahmed, Mehmed Çelebi b. İbrahim, İbrahim Beşe b. Osman, Hüseyin b. Receb, Mehmed b. Eyüb, Mehmed b. Mahmud.