Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 387 Hüküm no: 446 Orijinal metin no: [61b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Nasuh’un sattığı mumu Poliroz ve İstati’den almak üzere anlaştıkları Mahmiye-i İstanbul’da olan mumcu tâifesinin kethüdâları Ömer Bey b. Abdullah nâm kimesne ile yiğitbaşıları Todoş v. Anton ve ihtiyârlarından Kosta v. Todoş ve Todoş v. Nikola ve Apostol v. Dimo ve Yani v. Duka ve Kostantin v. Anton ve Kireççi v. Yani ve Hristo v. Yani ve Yani v. İsteryano ve Aleksi v. Kosta ve Dimo v. Yani nâm zimmîler meclis-i şer‘-i şerîf-i Ahmedî ve mahfil-i dîn-i münîf-i Muhammedî’de tâife-i mezbûreden bâ‘isü’s-sifr Poliroz ve İstati veledey Panayot nâm zimmîler mahzarlarında her biri takrîr-i kelâm edip Ayasofya-i Kebîr sûkunda Hacı Ebûbekir dükkânında bakkal olan hâzır bi’l-meclis Mehmed b. Nasuh dükkânında bey‘ edeceği mikdâr mumu kadîmden mezbûrân Poliroz ve İstati veregelip hâlâ mezbûr Mehmed sûk-ı mezbûrda bir bakkal dükkânı dahi istîcâr etmekle hâlâ ol istîcâr ettiği dükkânda dahi bey‘ edeceği mumu mezbûrân Poliroz ve İstati verip mezbûr bakkal Mehmed dahi gayrı kimesneden mum almamak üzre mezbûrûn Poliroz ve İstati ve bakkal Mehmed ile ittifâk eyledik vech-i mübeyyen üzre olan ittifâkımız hüccet olunup yedlerine def‘ olunmak matlûbumuzdur dediklerinde gıbbe’t-tasdîki’l-mu‘teber bu vesîka-i enîka ketb ve terkīm olunup mezbûrân Poliroz [ve] İstati yedlerine def‘ olundu. Fi’l-yevmi’s-sâdis aşer min Recebi’l-ferd li sene seb‘a ve seb‘în ve elf. Şuhûdü’l-hâl: Fahrü’l-akrân Mehmed Çelebi b. ( ) Kethüdâ-yı muhzırân, Ahmed Çelebi b. Hüseyin, Hasan Çelebi b. Ahmed, İbrahim Çelebi b. Ahmed, Şâlîzâde Osman Bey, Mustafa Çelebi b. el-Hâc Ahmed.