Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 387 Hüküm no: 447 Orijinal metin no: [61b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Hasan b. Abdullah’ın câriyesi Raziye’yi âzat ettiği Mahmiye-i İstanbul’da Molla Gürânî mahallesi sükkânından el-Hâc Hasan b. Abdullah nâm kimesne tarafından ikrâr-ı âti’z-zikre vekîl olduğu Ali Çelebi b. Hasan ve Abdullah b. Himmet nâm kimesneler şehâdetleri ile şer‘an sâbit olan Mustafa b. Ahmed nâm kimesne meclis-i şer‘-i hatîr-i lâzımü’t-tevkīrde bi’l-vekâle ikrâr ve takrîr-i kelâm edip müvekkilim merkūm el-Hâc Hasan kendiye rıkkını mu‘terife olan orta boylu, açık kaşlı, gök elâ gözlü Rûsiyyetü’l-asl işbu bâ‘isetü’l-kitâb Râziye bt. Abdullah nâm câriye-i memlûkesini üç ay mukaddem hasbeten lillâhi te‘âlâ ve taleben li merzâti’r-Rabbi’l-a‘lâ tahrîr ve i‘tâk ve zümre-i harâir-i asliyyâta idrâc ve ilhâk eyledi ba‘de’l-yevm mevsûfe-i mezbûre sâir harâir-i asliyyât gibi hürre olup müvekkilim mezbûrun üzerinde velâ-i şer‘îden gayrı hakkı [62a] ve alâkası kalmadı dedikde mâ hüve’l-vâki‘ bi’t-taleb ketb olundu. Fi’l-yevmi’s-sâmin aşer min Recebi’l-mürecceb li sene seb‘a ve seb‘în ve elf. Şuhûdü’l-hâl: Abdullah Efendi b. Himmet el-İmâm, el-Hâc Mehmed b. ( ), Dellâk Ali Çelebi, Dellâk Hasan Beşe, Hammâmî Çelebi [b.] Dellâk İbrahim Beşe, Süleyman Çelebi b. Mahmud, Ahmed b. Ramazan, Resul b. Rıdvan, İbrahim Çelebi b. Ahmed.