Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 527 Hüküm no: 659 Orijinal metin no: [101a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yahudi Cefider v. Yako’nun evini Mehmed Bey b. Ömer’e satması Mahmiye-i İstanbul hısnı ebvâbından Balatkapısı hâricinde Karabaş mahallesi ahâlîsinden olup Eski İstanbul cemâ‘atinden Cefider v. Yako nâm Yahudi meclis-i şer‘-i hatîr-i lâzımü’t-tevkīrde işbu râfi‘ü’l-kitâb Fahrü’l-eşbâh Mehmed Bey b. Ömer’in li ebeveyn er karındaşı ve tarafından ikrâr-ı âti’z-zikri tasdîke vekîl-i sâbitü’l-vekâleleri olan Hüseyin Bey nâm kimesne mahzarında bi’t-tav‘i’s-sâf ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olup mahalle-i mezbûrede vâki‘ bir tarafdan Yako v. Yasef nâm Yahudi mülkü ve bir tarafdan umdetü’l-muhadderât zübdetü’l-muvakkarât aliyyetü’z-zât safiyyetü’s-sıfât zâtü’l-aliyyi ve’s-sa‘âdât devletle sa‘âdetlü Hatice Sultan hazretleri kethüdâsı Fahri Hâtun mülkü ve bir tarafdan Sinaver v. Yasef nâm Yahudi mülkü ve bir tarafdan tarîk-i âm ile mahdûd fevkānî ve tahtânî büyût-ı adîdeyi ve fırını ve su kuyusu ve kenîfi ve tûlen on iki buçuk zirâ‘ ve arzen yirmi dört buçuk zirâ‘ arsayı hâvî mülk menzilimi cemî‘ tevâbi‘ ve levâhıkı ve kâffe-i hukūk ve merâfıkı ile müvekkil-i mezbûr Mehmed Bey’e bin yüz esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi ber vech-i muharrer iştirâ ve tesellüm ve kabûl eyledikden sonra semeni olan meblağ-ı mezkûr bin yüz guruşu müvekkil-i mezbûr Mehmed Bey yedinden tamâmen ahz ve kabz eyledim ba‘de’l-yevm menzil-i mahdûd-ı mezkûrda vechen mine’l-vücûh alâkam kalmadı müvekkil-i mezbûr Mehmed Bey’in mülk-i müşterâsı olmuşdur keyfe mâ yeşâ’ ve hasbe mâ yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî aşer min Şevvâli’l-mükerrem fi’s-seneti’l-mezbûre. Şuhûdü’l-hâl: Mehmed Efendi b. İbrahim el-İmâm-ı Câmi‘-i Kebîr, el-Hâc Hüseyin Ağa b. Ramazan, Musa Çavuş b. ( ), el-Hâc Pîr Mehmed Ağa b. ( ), Ali Efendi b. ( ) Keresteci, Bostânî Ömer, Bekçi Hüseyin.