Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 530 Hüküm no: 661 Orijinal metin no: [101b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sabatiye bt. Maro’nun evini Aslan v. Yahya’ya satması Mahmiye-i İstanbul hısnı ebvâbından Fenerkapısı dâhilinde Abdi Subaşı mahallesi sâkinelerinden Sabatiye bt. Murdehay nâm Yahudiye tarafından bey‘-i âti’z-zikri ve kabz ve semeni ikrâra vekîl olup hasm-ı câhid-i şer‘î mahzarında Aron v. Yako ve David v. Yasef nâm Yahudiler meclis-i şer‘-i hatîr-i lâzımü’t-tevkīrde işbu râfi‘ü’r-rakīm Aslan v. Yahya nâm Yahudi tarafından ikrâr-ı âti’z-zikri tasdîke vekîl-i sâbitü’l-vekâlesi olan Yasef v. Aslan nâm Yahudi muvâcehesinde bi’l-vekâle ikrâr-ı tâm ve takrîr-i kelâm edip müvekkilem merkūme Sabatiye akd-i âti’z-zikrin sudûruna değin silk-i mülkümde münselik olup Havâss-ı Aliyye kazâsı’na tâbi‘ kasaba-i Hasköy’de Pîrî Paşa mahallesinde vâki‘ bir tarafdan Nesim v. Hayder nâm Yahudi mülkü ve bir tarafdan Portakal Yako mülkü ve iki tarafdan tarîk-i âm ile mahdûd dokuz fevkānî ve üç tahtânî ve sofa ve üç su kuyusu ve zât-ı eşcâr-ı müsmire ve gayr-ı müsmire hadîkayı ve seddi ve şadırvanı ve havuzu müştemil mülk menzilini bi cümleti’t-tevâbi‘ ve’l-levâhık müvekkil-i mezbûr Aslan’a dört yüz kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ve temlîk ol dahi ber vech-i muharrer iştirâ ve tesellüm ve temellük ve kabûl eyledikden sonra semeni olan meblağ-ı mezkûr dört yüz guruşu müvekkil-i mersûm Aslan yedinden tamâmen ahz ve kabz eyledim ba‘de’l-yevm menzil-i mahdûd-ı mezkûrda vechen mine’l-vücûh alâkam [yokdur] müvekkil-i merkūm Aslan’ın mülk-i müşterâsı olmuşdur keyfe mâ yeşâ’ ve yahtâr mutasarrıf olsun dedi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis aşer min Şevvâli’l-mükerrem fi’s-seneti’l-mezbûre. Şuhûdü’l-hâl: Abdülganî Çelebi b. Hüseyin, Rıdvan Bey b. Abdullah, Nasuh Efendi b. Abdüsselâm, Hüseyin Efendi b. Ahmed, Hasan b. Abdullah, Ali b. Abdullah, Yusuf [b.] Abdullah.