Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 533 Hüküm no: 666 Orijinal metin no: [102a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gülistan bt. Abdullah’ın ölen kocası ve küçük oğlunun miras hisselerini aldığı Mahmiye-i İstanbul’da Sivrikoz mahallesinde sâkin iken bundan akdem vefât eden Süleyman b. Ahmed nâm sagīrin verâseti vâlidesi Gülistan bt. Abdullah nâm hâtun ile li ebeveyn er karındaşı Mustafa’ya münhasıra olduğu şer‘an zâhir ve mütehakkik oldukdan sonra merkūme Gülistan meclis-i şer‘-i şerîfde tereke-i sagīr-i müteveffâ-yı mezkûra vâzı‘atü’l-yed olup yine müteveffâ-yı mezbûrun li eb kız karındaşı olan işbu râfi‘atü’l-kitâb Fahrü’l-muhadderât Hâmide Hâtun bt. Ahmed Ağa’nın tarafından ikrâr-ı âti’z-zikri tasdîke vekîl olup nehc-i şer‘î ve tarîk-i mer‘î üzre vekâleti şer‘an sâbite olan Mehmed Çelebi b. Mehmed nâm kimesne mahzarında bi tav‘ihâ ikrâr-ı tâm ve takrîr-i kelâm edip sadrî sagīr oğlum müteveffâ-yı mezbûr Süleyman’ın babası olup kendiden mukaddem vefât eden Ahmed Ağa’nın kalîl ve kesîr ism-i mâl ıtlâk olunur terekesinden oğlum müteveffâ-yı mezbûrun hisse-i irsiyyesine isâbet ve intikāl eden on yedi bin altı yüz elli bir akçeden benim südüs hisse-i şer‘iyyeme isâbet eden üç bin yetmiş dört akçe hakkımı müvekkile-i mezbûre Hâmide Hâtun yedinden bi’t-tamâm ve’l-kemâl ahz ve kabz edip südüs hisse-i mezkûreme müte‘allik âmme-i da‘vâdan müvekkile-i mezbûre Hâmide Hâtun’un zimmetini ibrâ-i âm ile ibrâ ve iskāt eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer [min Şevvâli’l-mükerrem] fi’s-seneti’l-mezbûre. Şuhûdü’l-hâl: Hüseyin b. Ali, Mehmed b. Eyüb, Mehmed b. Mahmud, Yusuf b. Abdullah, Muharrem Çelebi b. Ahmed.