Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 388 Hüküm no: 448 Orijinal metin no: [62a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Beşe b. Şaban’ın, Arslan v. David’e verdiği borcu kefillerinin ödemesi gerektiği Mahmiye-i İstanbul’da Servi mahallesinde sâkin Ali Beşe b. Şaban nâm kimesne meclis-i şer‘de Portakal cemâ‘atinden Mosi v. Yasef ve Abraham v. Yasef nâm Yahudiler muvâcehelerinde üzerlerine da‘vâ ve takrîr-i kelâm edip gāib ani’l-meclis Portakal cemâ‘atinden Arslan v. David nâm Yahudi zimmetinde karz-ı şer‘îden dört yüz kırk esedî guruş hakkım olup meblağ-ı mezbûr dört yüz esedî guruşa merkūma Mosi ve Abraham ve gāibûn ani’l-meclis İlya v. David ve Yakom v. David ve Hayder v. ( ) nâm Yahudiler ale’l-iştirâki’s-seviy kefâlet-i sahîha-i şer‘iyye ile kefîl olmalarıyla hâzırân bi’l-meclis merkūmân Mosi ve Abraham’ın hisselerine isâbet eden seksen sekizer guruş mezbûrândan taleb ederim suâl olunsun dedikde gıbbe’s-suâl mezbûrân Mosi ve Abraham minvâl-i muharrer üzre müdde‘î-i merkūm Ali Beşe’nin merkūm Arslan zimmetinde olan dört yüz kırk esedî guruş hakkına kefâlet-i sahîha-i şer‘iyye ile kefîl olduklarını ikrâr ve i‘tirâf etmeleriyle ikrârları mûcebince hisselerine lâzım gelen seksen sekizer guruşu müdde‘î-i mezbûr Ali Beşe’ye edâya merkūmân Mosi ve Abraham’a tenbîh birle mâ vaka‘a bi’t-taleb ketb olundu. Fi’l-yevmi’l-hâmis aşer min Recebi’l-ferd li sene seb‘a ve seb‘în ve elf. Şuhûdü’l-hâl: Şükrullah Bey b. Mustafa, Hasan Çelebi b. Ahmed, İbrahim Çelebi b. Mehmed, Abdi Çelebi b. ( ).