Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 537 Hüküm no: 672 Orijinal metin no: [102b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmail Efendi b. Rüstem’in vârislerinin Mustafa Ağa’ya geri ödeyecekleri meblağ için birbirine kefil olmaları Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Câmi‘-i Kebîr mahallesi sükkânından iken bundan akdem vefât eden İsmail Efendi b. Rüstem nâm müteveffânın evlâd-ı sulbiyesi Abdullah ve Süleyman ve [İbrahim ile] Âişe meclis-i şer‘-i şerîfde düstûr-ı mükerrem müşîr-i müfahham vezîr-i sânî müsâhib-i şehriyârî devletlü ve sa‘âdetlü Mustafa Paşa hazretlerinin miftâh ağası olup işbu kitâb-ı sıhhat-nisâbın sâhibi olan mefharü’l-emâsil ve’l-akrân Mustafa Ağa b. Piyâle tarafından husûs-ı âti’l-beyâna vekîl olup nehc-i şer‘î ve tarîk-i mer‘î üzre vekâleti sâbite olan Ahmed Ağa b. Oruc mahzarında her biri ikrâr-ı tâm ve takrîr-i kelâm edip mahalle-i mezbûrede vâki‘ lede[’l-]ahâlî ma‘lûmü’l-hudûd menzili babamız müteveffâ-yı mezbûrdan irsen bize intikāl etmiş mülk-i mevrûsumuzdur deyû bundan akdem müvekkil-i mûmâ-ileyh Mustafa Ağa altı yüz altmış beş esedî guruşa bey‘ ve teslîm edip kabz-ı semen etmişidik hâlâ menzil-i mezkûr vakf-ı evlâd olduğu huzûr-ı hâkimde şuhûd-ı udûlle muvâcehemizde ba‘de’l-isbât meblağ-ı mezkûrun müvekkil-i mûmâ-ileyh Mustafa Ağa’ya edâsına tenbîh olun[muş idi.] el-hâletü hâzihî meblağ-ı mezkûr ile müvekkil-i mezbûrun menzil-i mezkûra mülkümdür deyû harc ve sarf eylediği iki yüz [103a] esedî guruş ki cem‘an sekiz yüz altmış beş esedî guruş müvekkil-i mûmâ-ileyh Mustafa Ağa’ya zimmetimizde lâzımü’l-edâ ve vâcibü’l-kazâ deynimiz olmağla meblağ-ı merkūm sekiz yüz altmış beş esedî guruşdan her birimiz âharın zimmetinde lâzım gelen meblağa kefîl ve zâmin olduk dediklerinden sonra merkūme Âişe’nin zevci Ahmed ve İbrahim ve Âişe’nin nefislerine ve hîn-i mütâlebede meclis-i şer‘a ihzârlarına kefîl oldum dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ aşer min Şevvâli’l-mükerrem li sene ihdâ ve tis‘în ve elf. Şuhûdü’l-hâl: Mehmed Çelebi b. Mustafa tâbi‘-i Hanzâde, Abdülganî Çelebi b. Hüseyin, el-Hâc Abdullah b. Şaban, Şeyh Mehmed Mevlevî, es-Seyyid Mehmed Efendi b. Mustafa, Musa Beşe b. Mehmed el-Mübâşir, Mustafa Çelebi b. Kâtib Abdüsselâm, Mustafa b. Nasuh, câbî Mehmed b. Ömer, Hacı Mehmed b. Mehmed.