Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 388 Hüküm no: 449 Orijinal metin no: [62a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen el-Hâc Ahmed b. Yusuf’un terekesinden kız kardeşinin oğlu Mehmed’in hissenin karısı Âişe bt. Yusuf’tan alınıp verilmesi Mahmiye-i İstanbul’da Hüsam Bey mahallesinde sâkin iken bundan akdem vefât eden el-Hâc Ahmed b. Yusuf’un verâseti zevce-i metrûkesi Âişe bt. Yusuf ile li ebeveyn kız karındaşı Tenzile’nin oğlu Mehmed nâm kimesneye münhasıra ve mezbûr Mehmed vech-i muharrer üzre müteveffâ-yı mezbûrun li ebeveyn kız karındaşı merkūme Tenzile’nin sadrî oğlu olduğu merkūme Âişe muvâcehesinde Muharrem Çelebi b. Mustafa ve Hasan b. el-Hâc Mehmed nâm kimesneler şehâdetleri ile sâbit oldukdan sonra merkūm Mehmed Çelebi meclis-i şer‘-i hatîrde tereke-i müteveffâ-yı mezbûra vâzı‘atü’l-yed olan merkūme Âişe mahzarında üzerine da‘vâ ve takrîr-i kelâm edip mûrisimiz müteveffâ-yı mezbûr Hacı Ahmed vefât eyledikde terekesinden kırk bin nakid akçe ve doksan şerîfi altın ve bir yeşil çuka ferâce ve iki tülbentini zevcesi merkūme Âişe kabz etmişidi suâl olunup bana isâbet eden hissem alıverilmesi matlûbumdur dedikde gıbbe’s-suâl mezkûre Âişe cevâbında fi’l-vâki‘ zevcim merkūm Hacı Ahmed vefât eyledikde terekesinden meblağ-ı mezbûr kırk bin nakid akçe ve doksan şerîfi altın ve bir yeşil çuka ferâce ve iki tülbentin kabz edip oğulluğum gāib ani’l-meclis helvacı Kara Mehmed’e bi tarîki’l-emâne vaz‘ eyledim deyû ikrâr ve i‘tirâf etmeğin mûcebince makbûzu olan meblağ-ı mezbûr ile eşyâ-i mezkûreden müdde‘î-i merkūm Mehmed’in selâse erba‘ hissesini edâ ve teslîme mezbûre Âişe’ye tenbîh olup mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min Recebi’l-ferd li sene seb‘a ve seb‘în ve elf. Şuhûdü’l-hâl: Süleyman Çelebi b. Receb, İbrahim Çelebi b. Mehmed, Mehmed b. Ramazan, Resul b. Ramazan.