Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 558 Hüküm no: 701 Orijinal metin no: [107b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Suyolcu köylerinin iştirâ zahiresi ve benzeri vergi talebiyle rencide olunmaması talebinin uygun karşılandığı Sa‘âdetlü ve merhametlü sultânım hazretleri sağ olsun bu kulları merhûm ve mağfûrun-leh Sultan Süleyman Hân -tâbe serâhû- hazretlerinin Kağıdhâne ve Halkalı cânibinde mahrûse-i İstanbul berât-ı atîk ve cedîde tarlamı hâs bahçelere icrâ ettirip suyun yolların berât-ı şerîfimle ta‘yîn olunan yedi aded kurânın yüz elli fukarâ kadar suyolcuları olup şitâda bedel-i ücret hizmet edip hizmet-i ırgadiyye mukābelesinde tekâlîf-i örfiyye ve şâkkadan müsellem olup mu‘âfımız Ma‘den Mukāta‘ası defterlerinde mastûr ve bu âna değin bir vech ile şâkka talebiyle rencîde olunmazlar iken ve rencîde olunmamak üzre Mâliye tarafından emr-i şerîf-i âlîşânımız var iken ve hâlâ memûr olduğumuz üzre hedm olan kemer ve su yolların ta‘mîr eder iken hâlâ Çekmece tarafından iştirâ cem‘ine memûr olanlar bu kullarından hilâf-ı mu‘âfnâme-i hümâyûn iştirâ taleb ve rencîde ederler Hak Sübhânehû ve te‘âlâ şevketlü pâdişâhımızı ve merhametlü sultânım hazretlerini hatâlardan hıfz eyleye su yolların hizmetinde berbâd olduk birazcık fukarâyız ancak fermân-ı pâdişâhî mûcebince sürsatımızı bi’t-tamâm verip ve su yolların tathîr ve ta‘mîr edip iştirâ ve tekâlîf-i örfiyye ve şâkka talebiyle rencîde olunmamak üzre mukaddemâ verilen hükm-i hümâyûn mûcebince Hâslar kadısına hitâben emr-i şerîf ricâ olunur bâkī fermân sultânım hazretlerinindir. Fukarâ-i bende-i suyolcuyân. Ellerinde olan mu‘âfnâmeleri mûcebince amel olunup rencîde olunmayalar deyû Hâslar kadısına hüküm. Fî 15 Şevvâl sene [10]91. Dîvân-ı hümâyûn kâtiblerinden Mehmed Efendi yed[iyle] gelmişdir.