Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 389 Hüküm no: 451 Orijinal metin no: [62a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Benefşe bt. Ali ile Mehmed b. Abdullah ve Maryem bt. Marat arasındaki darp davasında sulh olduğu Mahmiye-i Kostantıniyye hısnı ebvâbından Topkapısı dâhilinde Bayezid Ağa mahallesi sâkinelerinden Benefşe bt. Ali nâm Kıbtiye meclis-i şer‘-i celîl-i lâzımü’t-tebcîlde mahalle-i mezbûre ahâlîsinden kendi tarafından asîl ve zevcesi Güllü bt. Alhas nâm Ermeniye tarafından husûs-ı âti’l-beyâna vekîl olup zât-ı mezbûreyi ma‘rifet-i şer‘iyye ile ârifân Ahmed Efendi b. Mustafa ve Hüseyin b. Ahmed nâm kimesneler şehâdetleri ile şer‘an vekâleti sâbite olan Mehmed b. Abdullah nâm kimesne ile müvekkile-i mezbûre Güllü’nün anası Maryem bt. Marat nâm Ermeniye mahzarlarında takrîr-i kelâm edip mezbûr Mehmed bundan akdem asâleten ve vekâleten hâmile olan zevcem ve müvekkilem mezbûre Güllü’[yü] bi gayrı hakkın yumruk ile birkaç def‘a darb etmenle senin darbından nâşî müstebînü’l-hilka ilkā-i cenîn eylemiş idi deyû mezbûre Maryem dahi beni bi gayrı hakkın yumruk ile birkaç darb etmiş idi deyû bundan da‘vâ eylediklerinde ben dahi inkâr ettiğimde beynimizde münâza‘ât-ı kesîre vukū‘undan sonra muslihûn tavassut edip mezbûr Mehmed ile beynimizde nakd-i râyic fi’l-vakt iki bin akçe üzerine inşâ-i akd-i sulh ettiklerinde ol dahi sulh-i mezbûru bi’l-asâle ve’l-vekâle kabûl edip bedel-i sulh-i mezkûru tamâmen yedimden alıp kabz edip da‘vâ-yı mezbûresinden mezbûr Mehmed asâleten ve vekâleten benim zimmetimi ibrâ-i âmm-ı kātı‘ü’n-nizâ‘ ile ibrâ eyledikden sonra mezbûre Maryem dahi da‘vâ-yı mezbûresinden benim zimmetimi meccânen ibrâ eylemişdir suâl olunup takrîri tahrîr olunmak matlûbumdur dedikde gıbbe’s-suâl mezbûr Mehmed ile merkūme Maryem’den her biri cevâbında kaziyye şerh ve beyân olunduğu üzre olup her birimiz vech-i muharrer üzre da‘vâmızdan asâleten ve vekâleten mezbûre Benefşe’nin zimmetini ibrâ-i âmm-ı kātı‘ü’n-nizâ‘ ile ibrâ eyledik deyû bi tav‘i’s-sâf ikrâr ve i‘tirâf etmeğin mâ vaka‘a bi’t-taleb ketb olundu. Fi’l-yevmi’l-hâmis aşer min Recebi’l-ferd li sene seb‘a ve seb‘în ve elf. Şuhûdü’l-hâl: Mustafa Efendi b. Ramazan el-İmâm, fahrü’l-akrân Ahmed Ağa b. Abdullah, Hasan Beşe b. Osman, Murtaza Halîfe b. Muharrem el-Müezzin, Mehmed b. Abdullah, Ahmed b. Abdullah.