Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 390 Hüküm no: 452 Orijinal metin no: [62a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Mansur ile amcası el-Hâc Nasreddin’in davalarında anlaştıkları Hasırcı tâifesinden olup Dârü’l-hilâfeti’l-aliyye Kostantıniyye el-mahmiyye mahallâtından Üskübî mahallesi sâkinlerinden olan el-Hâc Mansur b. el-Hâc Mansur nâm kimesne meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda tâife-i mezbûrdan li ebeveyn ammi el-Hâc Nasreddin b. el-Hâc Yunus mahzarında ikrâr ve takrîr-i kelâm edip ammim mezbûr el-Hâc Nasreddin ile beynimizde nice ahz ve i‘tâ ve mu‘âmelât-ı şettâ vakı‘a olmuşidi el-hâletü hâzihî târih-i kitâba gelince ammim mezbûr el-Hâc Nasreddin ile beynimizde cârî olan ahz ve i‘tâ ve mu‘âmelât-ı şettâ ve sâir hukūk-ı merkūme ve mechûleye müte‘allika âmme-i de‘âvî ve mütâlebâtdan her birimiz âharın zimmetini ibrâ-i âmm-ı kātı‘ü’n-nizâ‘ ile ibrâ eyledik dedikde gıbbe’t-tasdîki’l-vicâhî ve’t-tahkīki’ş-şifâhî mâ hüve’l-vâki‘ bi’t-taleb ketb ve imlâ olundu. Fi’l-yevmi’s-sâmin aşer min Recebi’l-ferd li sene seb‘a ve seb‘în ve elf. Şuhûdü’l-hâl: Fahrü’l-eşbâh el-Hâc Nimetullah b. ( ), Şeyh Mehmed Senârî? İmâm-ı Kızanlık mescid, el-Hâc Mustafa b. el-Hâc Ali, Mehmed Çelebi b. el-Hâc Cafer, el-Hâc Sâlim b. el-Hâc Şerefeddin.