Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 391 Hüküm no: 453 Orijinal metin no: [62b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Bey b. Mehmed’in, ev arsasını Ali b. Mehmed’e sattığı Umdetü erbâbi’t-tahrîr ve’l-kalem Mehmed Efendi b. Ahmed Ağa tarafından husûs-ı âti’l-beyâna vekîl olduğu Medîne-i Hazret-i Ebî Eyyûb-i Ensârî’de Debbâğlar Deresi’nde Musa Çavuş mescidi’ne imâm olan Hasan Efendi b. Ramazan ve mahmiye-i İstanbul’da Güngörmez mahallesi sükkânından Ali b. Hüseyin nâm kimesneler şehâdetleri ile şer‘an sâbit olan Mustafa Bey b. Mehmed nâm kimesne, meclis-i şer‘-i şerîf-i lâzımü’t-teşrîfde bâ‘isü’l-kitâb Ali b. Mehmed nâm kimesne mahzarında ikrâr ve takrîr-i kelâm edip müvekkilim mûmâ-ileyh Mehmed Efendi akd-i âtî sudûruna değin yedin[d]e mülkü ve hakkı olup mahmiye-i mezbûrda Parmakkapı kurbunda Dîvâne Ali mahallesinde vakı‘a bir tarafdan Osman Çavuş mülkü ve bir tarafdan bakkal Mustafa Beşe mülkü ve bir tarafdan Abdülgaffâr mülkü ve bir tarafdan tarîk-i âm ile mahdûd menzil arsası tarafeynden îcâb ve kabûlü hâvî bey‘-i bâtt-ı sahîh-i şer‘î ile dokuz yüz esedî guruşa mezbûr Ali Beşe’ye bey‘ ve teslîm edip ol dahi iştirâ ve tesellüm ettiğinden sonra semen-i mezbûr dokuz yüz esedî guruşu merkūm Ali yedinden tamâmen ahz u kabz eyledi min ba‘d arsa-i mahdûd-ı mezbûra merkūm Ali’nin mülkü müşterâsı ve hakk-ı tasarrufudur keyfe mâ yeşâ’ ve yahtâr mutasarrıf olsun dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’l-hâmis aşer min Recebi’l-ferd li sene seb‘a ve seb‘în ve elf. Şuhûdü’l-hâl: Umdetü’l-müderrisîni’l-kirâm Mehmed Efendi, umdetü erbâbi’t-tahrîr ve’l-kalem Ahmed Efendi Halîfe-i muhâsebe, zübdetü erbâbi’t-tahrîr ve’r-rakam Mehmed Halîfe-i muhâsebe, Abdullah Efendi b. Mehmed, İbrahim b. Ahmed, fahrü’l-müderrisîn Ahmed Efendi el-Muhâsib, Eyüb Çelebi b. Süleyman, Receb Çelebi b. Hacı Murad, umdetü’l-a‘yân Abdullah Ağa b. Süleyman, Ebûbekir Ağa b. ( ) el-Cündî, Şeyhzâde Sunullah Efendi, Mustafa Ağa b. Mehmed, Hasan b. Ramazan, Küçük Mehmed b. Mustafa, Şahbaz Bey b. Abdullah, Mehmed b. Süleyman Ağa, Kalkancılar müezzini Eyüb Çelebi.