Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 579 Hüküm no: 741 Orijinal metin no: [112b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mısır’da kadı olan Abdülkâdir Efendi’nin üzerine oğlu Mehmed Emin için nafaka takdiri Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî- mahallâtından Baba Haydar mahallesi sâkinelerinden iken bundan akdem fevt olan Atiyye bt. Resul nâm müteveffâtın verâseti zevci Abdülkādir Efendi b. İbrahim ile vâlidesi Kerime bt. Bağdâdî Ahmed Efendi’ye ve sadrî oğlu Mehmed Emin nâm sagīre münhasıra olduğu şer‘an zâhir ve mütehakkik oldukdan sonra merkūme Kerime tarafından husûs-ı âti’l-beyâna vekîl-i sâbitü’l-vekâle olan Nasuh Efendi b. Abdüsselâm meclis-i şer‘-i şerîfde bi’l-vekâle takrîr-i kelâm ve ta‘bîr ani’l-merâm edip müvekkilem mezbûre Kerime Hâtun’un sadriye kızı müteveffât-ı merkūmenin sadrî oğlu olup bi hakki’l-hidâne hucr ve terbiyesinde olan sagīr-i mezbûr Mehmed Emin’in ancak nafakası için dokuz akçe ile iktifâ edip kisvesini babası gāib ani’l-meclis mûmâ-ileyh Abdülkādir Efendi edivermek üzre beynlerinde kavl ve ta‘ahhüd etmişler idi hâlâ babası mûmâ-ileyh Abdülkādir Efendi diyâr-ı Mısır kuzâtından olup mahrûse-i Mısır tarafına teveccüh ve azîmet etmekle müvekkile-i mezbûre sagīr-i mezbûrun babası mûmâ-ileyh Abdülkādir Efendi üzerine nafaka ve kisve-bahâ takdîr olunmak murâdımdır dedikde hâkim-i muvakki‘-i sadr-ı kitâb tûbâ-leh ve hüsnü me’âb hazretleri dahi sagīr-i mezbûrun nafaka ve kisve-bahâsı için babası mûmâ-ileyh Abdülkādir Efendi üzerine târih-i kitâbdan yevmî on ikişer akçe farz ve takdîr edip meblağ-ı mefrûz-ı mezkûru harc ve sarfa ve lede’l-hâce istidâneye ve vakt-i zaferde mûmâ-ileyh Abdülkādir Efendi üzerine rücû‘a müvekkile-i mezbûreye izin birle mâ vaka‘a bi’t-taleb ketb olundu. Fi’l-yevmi’s-sâdis aşer min şehri Ramazâni’l-mübârek li sene ihdâ ve tis‘în ve elf. Şuhûdü’l-hâl: İshak Efendi el-Müderris, Hüseyin Çelebi b. Ali, Mehmed b. Eyüb, Mehmed b. Mahmud, Hasan b. Abdullah, Yusuf b. Abdullah, Mustafa Efendi b. İsmail.