Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 581 Hüküm no: 743 Orijinal metin no: [113a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Hüseyin üzerine amcası Mustafa’nın vasî tayin olunması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Mehmed Bey es-Selâmi mahallesi sükkânından iken tarîk-i hacc-ı şerîfde bundan akdem vefât eden Hüseyin b. Gülümşah nâm müteveffânın verâseti zevce-i metrûkesi Rukiye bt. Hasan nâm hâtun ile sulbî oğulları Mustafa ve Abdürrezzak nâm sagīrler ile merkūme Rukiye’nin hamline münhasıra olduğu şer‘an zâhir ve müte‘ayyin oldukdan sonra sagīr-i mezbûr Mustafa’ya babası müteveffâ-yı mezbûr Hüseyin’den bi’l-irsi’ş-şer‘î intikāl eden malını hıfz ve ahvâlini zabta bir vasî nasb ve ta‘yîn olunmak lâzım ve mühim olmağla hâkim-i muvakki‘-i sadr-ı kitâb tûbâ-leh ve hüsnü me’âb hazretleri sagīr-i mezbûr Mustafa’nın li ebeveyn ammisi işbu râfi‘ü’l-kitâb Mustafa b. Gülümşah nâm kimesne mahal ve müstahık ve vesâyet uhdesinden gelmeğe her vechile kādir olduğu sikāt-ı muvahhidîn ihbâr etmekle sagīr-i mezbûrun babasından irsen intikāl eden malını hıfza ve ahvâlini zabta ammisi mezbûr Mustafa’yı sagīr-i mezbûrun üzerine vasî nasb ve ta‘yîn edip ol dahi vesâyet-i merkūmeyi kabûl ve merâsimini edâya ta‘ahhüd ve iltizâm etmeğin mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min Şevvâli’l-mükerrem li sene ihdâ ve tis‘în ve elf. Şuhûdü’l-hâl: Mehmed Efendi b. Nasuh, Nasuh Efendi b. Abdüsselâm, Hüseyin Beşe b. Receb Çukadâr, Hüseyin Efendi b. Ahmed.