Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 582 Hüküm no: 744 Orijinal metin no: [113a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Hüseyin’in vasîsi üzerine Nasuh b. İbrahim’in nâzır tayin olunması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Mehmed Bey es-Selâmi mahallesi sükkânından iken bundan akdem tarîk-i hacc-ı şerîfde vefât eden Hüseyin b. Gülümşah nâm müteveffânın sulbî sagīr oğlu Mustafa’ya babası müteveffâ-yı mezbûr mezkûr Hüseyin’den irsen intikāl eden malını hıfza ve ahvâlini zabt için kıbel-i şer‘-i hatîrden vasî nasb ve ta‘yîn olunan li ebeveyn ammisi Mustafa b. Gülümşah nâm kimesnenin üzerine hasbî nâzır nasb ve ta‘yîn olunmak lâzım ve mühim olmağın hâkim-i muvakki‘-i sadr-ı kitâb tûbâ-leh ve hüsnü me’âb hazretleri dahi işbu hâmilü’l-hurûf Nasuh b. İbrahim nâm kimesne her vechile nezârete müstahık olmağla mezbûr Nasuh’u vasiyy-i merkūm Mustafa üzerine hasbî nâzır nasb ve ta‘yîn edip ol dahi nezâret-i merkūmeyi kabûl ve levâzımını edâya ta‘ahhüd ettikden sonra vesâyet-i merkūmeyi nâzır-ı merkūm Nasuh ma‘rifetiyle görmek üzre vasiyy-i mezbûr Mustafa’ya ba‘de’t-tenbîh, mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Şevvâli’l-mükerrem li sene ihdâ ve tis‘în ve elf. Şuhûdü’l-hâl: Mehmed Efendi b. Nasuh, Nasuh Efendi b. Abdüsselâm, Hüseyin Beşe b. Receb, Hüseyin Efendi b. Ahmed.