Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 582 Hüküm no: 745 Orijinal metin no: [113a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tanaş v. Petre’nin evi ile bağlarını Abdullah oğulları Ali ve Hüseyin’e satması Vilâyet-i Rumeli’nde Opar kazâsına tâbi‘ Varvara nâm karye ahâlîsinden Tanaş v. Petre nâm zimmî meclis-i şer‘-i hatîr-i lâzımü’t-tevkīrde işbu râfi‘â’l-kitâb Ali ve Hüseyin ibney Abdullah nâm kimesneler mahzarında tav‘an ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülkümde münselik olup karye-i mezbûrede vâki‘ bir tarafdan Ali Beşe mülkü ve bir tarafdan dere ve bir tarafdan Şafo tarlası ve bir tarafdan tarîk-i âm ile mahdûd bir bâb fevkānî ve bir bâb tahtânî odaları ve bostan yerini ve samanlığı ve harman yerini ve iki armut ağacı ve zât-ı eşcâr-ı müsmire ve gayr-ı müsmireyi müştemil menzilimi bi cümleti’t-tevâbi‘ ve’l-levâhık ve yine karye-i mezbûre sınırı dâhilinde Lovişte? nâm mevzi‘de vâki‘ lede’l-ahâlî ma‘lûmü’l-hudûd üç kıt‘a mülk bağlarımı ve zikr olunan bağlarda vâki‘ bir armut ağacı ve nısf armut ağacı ve Çalık İbrahim nâm kimesnenin tarlasında bir dib armut ağacını dahi mezbûrân Ali ve Hüseyin’e bi safkatin vâhidetin iki bin yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve temlîk edip anlar dahi ale’l-iştirâki’s-seviy iştirâ ve temellük ve kabûl eyleyip semeni olan meblağ-ı mezkûr iki bin yüz akçeyi mezbûrân Ali ve Hüseyin yedlerinden bi’t-tamâm ahz ve kabz eylediğimden sonra emlâk-i mezkûru mahallinde zabt ve tasarrufa mezbûrân Ali ve Hüseyin’i taslît eyledim ba‘de’l-yevm emlâk-i merkūmede vechen mine’l-vücûh alâka ve medhalim kalmadı mezbûrân Ali ve Hüseyin keyfe mâ yeşâ’ân mutasarrıfân olsunlar dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min Şevvâli’l-mükerrem li sene ihdâ ve tis‘în ve elf. Şuhûdü’l-hâl: İbrahim Beşe Bostânî, Mustafa b. Mehmed, Ali Beşe b. Mustafa, Ali b. Mehmed, Osman Turveliçili, Mehmed Varvaralı, Minho [v.] Minho, Mitre [v.] Pedriyo?.