Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 583 Hüküm no: 746 Orijinal metin no: [113a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdülkâdir Beşe b. İbrahim’in arsasını Halil Beşe b. İbrahim’e satması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Sofular mahallesi sükkânından Abdülkādir Beşe b. İbrahim nâm kimesne meclis-i şer‘-i hatîr-i lâzımü’t-tevkīrde işbu râfi‘ü’l-kitâb Halil Beşe b. İbrahim nâm kimesne mahzarında tav‘an ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olup mahalle-i mezbûrede vâki‘ etrâf-ı erba‘adan debbâğ Hasan ve Yusuf Ağa ve Receb Beşe ve Âişe Hâtun mülkleri ile mahdûd tûlen ve arzen bi hesâb-ı terbî‘î yirmi zirâ‘ mülk arsa-i hâliyemi cemî‘ tevâbi‘iyle mezbûr Halil Beşe’ye dört yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve temlîk ve teslîm ol dahi ber vech-i muharrer iştirâ ve tesellüm ve temellük ve kabûl eyledikden sonra semeni olan meblağ-ı mezkûr dört yüz akçeyi mezbûr Halil Beşe yedinden bi’t-tamâm ve’l-kemâl ahz ve kabz eyledim ba‘de’l-yevm arsa-i merkūme mezbûr Halil Beşe’nin mülk-i müşterâsı olmuşdur keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min Şevvâli’l-mükerrem li sene ihdâ ve tis‘în ve elf. Şuhûdü’l-hâl: Mehmed Beşe b. Abdullah, Seydî Beşe b. Hüseyin, Halil Beşe b. Mehmed, Mustafa b. Hasan, Mehmed Beşe b. Mustafa, Ömer Beşe b. Mehmed, Hasan b. Abdullah, Yusuf b. Abdullah.