Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 583 Hüküm no: 747 Orijinal metin no: [113b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kasım Bey b. Sâlih’in değirmenini Peto v. Kiko’ya satması Vilâyet-i Rumeli’nde Livâ-i Ohri’de İstarova kazâsına tâbi‘ Piskopiye nâm karye ahâlîsinden Kasım Bey b. Sâlih nâm kimesne meclis-i şer‘-i hatîr-i lâzımü’t-tevkīrde işbu râfi‘ü’r-rakīm Peto v. Kiko nâm zimmî muvâcehesinde tav‘an ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülkümde münselik olup karye-i mezkûrede kilise kurbunda vâki‘ karye-i merkūme nehri üzerinde dâir etrâf-ı erba‘adan dere ve tarîk-i âm ve Kika ve (…) mülkleri ile mahdûd eşcâr-ı müsmire ve gayr-ı müsmire bahçeyi ve bir mikdâr arsa-i hâliyeyi müştemil bir göz değirmenimi, bi cümleti’t-tevâbi‘ ve’l-levâhık merkūm Peto’ya kırk yedi kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve temlîk edip ol dahi minvâl-i muharrer üzre iştirâ ve temellük ve kabûl eyleyip semeni olan meblağ-ı mezkûr kırk yedi guruşu merkūm Peto yedinden tamâmen ahz ve kabz eylediğimden sonra zikr olunan değirmeni mahallinde zabt ve tasarrufa mersûm Peto’yu taslît eyledim ba‘de’l-yevm sâlifü’z-zikr değirmen-i mesfûr Peto’nun mülk-i müşterâsı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min Şevvâli’l-mükerrem li sene ihdâ ve tis‘în ve elf. Şuhûdü’l-hâl: Mustafa Ağa b. Mehmed, Hamza Sipâhi b. Osman, Sinan b. Ahmed, Mustafa Beşe b. Hasan, Sâlih b. Ali, Ali b. Hüseyin.