Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 584 Hüküm no: 748 Orijinal metin no: [113b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Çelebi b. Mehmed Usta’nın menzil hissesini kardeşi Osman Çelebi’ye satması Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî-’de Evlice Baba mahallesinde sâkin iken bundan akdem vefât eden Mehmed Usta b. Abdullah’ın verâseti sulbî kebîr oğulları Ali Çavuş ve Osman Çelebi ve Ahmed Çelebi’ye münhasıra olduğu şer‘an zâhir ve mütebeyyin oldukdan sonra mezbûr Ahmed Çelebi meclis-i şer‘-i şerîfde karındaşı işbu râfi‘ü’l-kitâb mezbûr Osman Çelebi mahzarında ikrâr ve i‘tirâf edip babamız müteveffâ-yı mezbûrun mülkü olup ba‘de vefâtihî irsen üçümüze intikāl edip mahalle-i mezbûrede vâki‘ bir tarafı Hasan Beşe mülkü ve bir tarafı Ali Çavuş mülkü ve ba‘zan bostancı Mahmud mülkü ve bir tarafı Keçi Hasan mülkü ve bir tarafı tarîk-i âm ile mahdûd ve mülk menzilde olan sülüs hisse-i şer‘iyye-i şâyi‘amı cemî‘ tevâbi‘ ve levâhıkı ile mezbûr Osman Çelebi’ye yüz kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve temlîk ve teslîm ol dahi minvâl-i muharrer üzre iştirâ ve temellük ve tesellüm ve kabûl eyledikden sonra semeni olan meblağ-ı mezbûr yüz esedî guruşu mezbûr Osman Çelebi yedinden bi’t-tamâm ve’l-kemâl ahz ve kabz eyledim ba‘de’l-yevm menzil-i mahdûd-ı mezkûrda olan sülüs hisse-i şer‘iyye-i şâyi‘amda vechen mine’l-vücûh alâka ve medhalim yokdur mezbûr Osman Çelebi’nin mülk-i müşterâsı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn min Şevvâli’l-mükerrem fi’s-seneti’l-mezbûre. Şuhûdü’l-hâl: Mehmed Efendi el-İmâm, İbrahim Çelebi b. Mustafa, Halil b. Ahmed, Mehmed Çelebi b. Mustafa, Abdullah Çelebi b. Abdullah, Mustafa Beşe b. Mehmed, Ahmed Çelebi b. Mehmed.