Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 585 Hüküm no: 749 Orijinal metin no: [113b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tanaş v. Petro’nun bağlarını Varvara köyü ahalisine temlik etmesi Vilâyet-i Rumeli’nde Opar kazâsına tâbi‘ Varvara nâm karye ahâlîsinden Tanaş v. Petro nâm zimmî meclis-i şer‘-i şerîfde karye-i mezbûre ahâlîsinden işbu bâ‘isü’l-kitâb Mehmed b. Abdullah ve Hüseyin b. Abdullah ve Ali b. Abdullah ve diğer Ali b. Abdullah nâm kimesneler muvâcehelerinde ikrâr ve takrîr-i kelâm edip silk-i mülk-i sahîhimde münselik olup karye-i mezbûre sınırı dâhilinde mevâzi‘-i müteferrikada Yurupa? demekle ma‘rûf mahalde vâki‘ her birinin hudûdu beynimizde ma‘lûm üç kıt‘a mülk bağları, cemî‘ tevâbi‘i karye-i mezbûre ahâlîsine temlîk edip mahallinde zabt ve tasarrufa ahâlî-i mersûmeyi taslît eyledim ba‘de’l-yevm zikr olunan bağları her sene karye-i mezbûre ahâlîsi îcâr edip hâsıl olan icâresini tekâlîflerine versinler zikr olunan üç kıt‘a bağlarda vechen mine’l-vücûh alâka ve medhalim kalmadı dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn min Şevvâli’l-mükerrem fi’s-seneti’l-mezbûre. Şuhûdü’l-hâl: Hüseyin b. Ali, Mehmed b. Eyüb, Mehmed b. Mahmud, Ali b. İslâm, Nasuh Efendi b. Abdullah.