Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 585 Hüküm no: 750 Orijinal metin no: [113b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Arhondo bt. Dimo’nun evini Aleksi v. Dimitri’ye satması Havâss-ı Aliyye kazâsına tâbi‘ Terkos nâhiyesi müzâfâtından Yeniköy demekle ma‘rûfe karyede sâkine Arkondo bt. Dimo nâm nasrâniyye meclis-i şer‘-i hatîr-i lâzımü’t-tevkīrde işbu bâ‘isü’r-rakīm Aleksi v. Dimitri nâm zimmî muvâcehesinde bi tav‘ihâ ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülkümde münselik olup karye-i mezbûrede vâki‘ etrâf-ı erba‘adan Parmaksız Panayot ve Yorgo [v.] Koka ve Ano [v.] Todori ve Edirneli Yorgo mülkleri ve tarîk-i âm ile mahdûd bir bâb tahtânî oda ve havluyu müştemil menzilimi bi cümleti’t-tevâbi‘ ve’l-levâhık merkūm Aleksi’ye on beş kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi ber vech-i muharrer iştirâ ve tesellüm ve kabûl eyledikden sonra semeni olan meblağ-ı mezkûr on beş guruşu mersûm Aleksi yedinden tamâmen ahz ve kabz eyledim ba‘de’l-yevm menzil-i mahdûd-ı merkūm Aleksi’nin mülk-i müşterâsı olmuşdur keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Şevvâli’l-mükerrem fi’s-seneti’l-mezbûre. Şuhûdü’l-hâl: Hasan b. Abdullah, Yusuf b. Abdullah, Mehmed b. Eyüb, Ali b. Abdullah, Yorgo Edirneli, Tanaş, Parmaksız Panayot, Yorgo Aci, Ester Aci, Kosta [v.] Aleksandri Aci.