Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 586 Hüküm no: 751 Orijinal metin no: [114a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. İbrahim’in çiftliğini Hüseyin Çelebi b. Mustafa’ya satıp tarlalarının da kullanım hakkını devretmesi Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî-’de Bıçakçı Ferhad mahallesi sâkinelerinden Fâtıma bt. İbrahim nâm hâtun meclis-i şer‘-i şerîfde işbu râfi‘ü’l-kitâb Hüseyin Çelebi b. Mustafa mahzarında bi tav‘ihâ ikrâr-ı tâm ve takrîr-i kelâm edip akd-i âti’z-zikrin sudûruna değin Hatice bt. Hüseyin nâm hâtun ile ale’l-iştirâki’s-seviy silk-i mülk-i sahîhimde münselik olup medîne-i mezbûre müzâfâtından Küçükçekmece nâhiyesine tâbi‘ Anankorya? nâm karyede vâki‘ bir tarafı Ahmed Ağa bahçesi ve bir tarafı mezbûr Hüseyin Çelebi mülkü ve bir tarafı mer‘â ve bir tarafı tarîk-i âm ile mahdûd dâhiliyyesinde dört bâb fevkānî oda ve altında üç bâb ahır ve hâriciyyesinde bir bâb fevkānî oda ve bir samanlık ve bir fırın ve iki un anbarı müştemil çiftlik ta‘bîr olunur mülk menzilde olan nısf hisse-i şer‘iyye-i şâyi‘amı cemî‘ tevâbi‘ ve levâhıkı ile ve içinde mevcûd on keyl buğday ve beş keyl arpa ve yedi keyl alef ve bir kara sığır öküzü ve bir inek ve bir dana ve bir araba ve bir kargı? bi safkatin vâhidetin mezbûr Hüseyin Çelebi’ye on üç bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ve temlîk edip ol dahi minvâl-i muharrer üzre iştirâ ve tesellüm ve temellük ve kabûl eyledikden sonra yine tefvîz-i âtî sudûruna değin zabt ve taht-ı tasarrufumda olup karye-i mezbûre sınırı dâhilinde mevâzi‘-i müteferrikada vâki‘ her birinin hudûdu beynimizde ma‘lûm on bir kıt‘a tarlalarımın dahi hakk-ı tasarruflarını bi izni’l-mütevellî mezbûr Hüseyin Çelebi’ye iki bin akçe bedel mukābelesinde tefvîz bi’l-ferâğ edip ol dahi minvâl-i muharrer üzre tefevvuz ve kabûl eyledikden sonra semen-i mezbûr ile bedel-i merkūm cem‘an on beş bin akçeyi mezbûr Hüseyin Çelebi yedinden bi’t-tamâm ve’l-kemâl ahz ve kabz eyledim ba‘de’l-yevm emlâk-i merkūmenin nısfında ve eşyâ-i merkūmede vechen mine’l-vücûh alâka ve medhalim yokdur, mezbûr Hüseyin Çelebi’nin mülk-i müşterâsı ve arâzi-i merkūme dâhil-i taht-ı tasarrufu olmuşdur keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâdis ve’l-ışrîn fi’s-seneti’l-mezbûre. Şuhûdü’l-hâl: Halil Efendi el-İmâm, Hüseyin Çelebi b. Hasan, Mehmed Çelebi b. Osman, Ahmed b. Mehmed, Yusuf Bey Muhtesib, İbrahim b. Mustafa.