Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 586 Hüküm no: 752 Orijinal metin no: [114a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf b. Abdullah ile karısı Âişe bt. Süleyman’ın evlerini Düğmecibaşı Vakfı’na istiğlâl yoluylasatmaları Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Evlice Baba mahallesi sükkânından Yusuf b. Abdullah nâm kimesne asâleten ve zevcesi Âişe bt. Süleyman nâm hâtun tarafından husûs-ı âti’l-beyâna vekîl-i sâbitü’l-vekâlesi olan Murtaza Bey b. Abdullah nâm kimesne vekâleten meclis-i şer‘-i hatîr-i lâzımü’t-tevkīrde medîne-i mezbûrede vâki‘ merkūm Düğme[ci]başı vakfı’na bi’l-fi‘l mütevellî olan işbu râfi‘ü’l-kitâb Mehmed Çelebi b. Abdülkādir nâm kimesne mahzarında her biri asâleten ve vekâleten ikrâr-ı tâm ve takrîr-i kelâm edip silk-i mülkümüzde münselik olup mahalle-i mezbûrede Evlice Baba’da vâki‘ etrâf-ı erba‘adan şerbetçi Osman ve yasakçı Mehmed mülkleri ve dere ve tarîk-i âm ile mahdûd mülk menzilimizi bi cümleti’t-tevâbi‘ ve’l-levâhık mütevellî-i mezbûr Mehmed Çelebi’ye on beş kıt‘a esedî guruşa bi tarîki’l-istiğlâl bey‘ ve teslîm ol dahi vakf-ı mezkûr malıyla tarîk-i merkūm üzre iştirâ ve tesellüm ve kabûl eyleyip semeni olan meblağ-ı merkūm on beş guruşu mütevellî-i mezbûr Mehmed Çelebi yedinden tamâmen ahz ve kabz eylediğimizden sonra yine mütevellî-i mezbûr Mehmed Çelebi menzil-i mahdûd-ı mezkûru ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan her senesi ikişer guruş ve bir rub‘dan üç sene tamâmına değin cem‘an altı esedî guruş ve üç rub‘ guruş ücret ile bize îcâr ve teslîm biz dahi ber vech-i muharrer istîcâr ve tesellüm ve kabûl eyledik dediklerinde gıbbe’[t-tasdîki’ş]-şer‘î mersûm Murtaza Bey mütevellî-i mezbûr Mehmed Çelebi mahzarında takrîr-i kelâm edip menzil-i mezkûrun derkine ve ücret-i merkūme ve meblağ-ı mezbûra emr ve kabûlü hâviye kefâlet-i sahîha-i şer‘iyye ile kefîl oldum dedikde ba‘de’t-tasdîk ve’l-kabûl mâ vaka‘a bi’t-taleb ketb olundu. Fî seneti’l-mezbûre. Şuhûdü’l-hâl: Mehmed Halîfe b. Hasan el-İmâm, Cuma b. Mehmed, Hasan b. Abdullah, Mehmed b. Eyüb, Yusuf b. Abdullah.