Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 587 Hüküm no: 753 Orijinal metin no: [114a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Evine yabancı erkek alan Âişe bt. Mehmed’in mahalleden çıkarılması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Çavuş Kasım mahallesi ahâlîsinden bâ‘isü’l-kitâb Mehmed Efendi b. Mustafa el-İmâm ve Mustafa Halîfe b. Mehmed el-Müezzin ve Receb Ağa b. Osman ve Mehmed Çelebi b. Eyüb ve Ali b. Mehmed ve Süleyman Efendi b. Hızır ve el-Hâc Abdullah b. Abdullah ve Mustafa b. Mehmed nâm kimesneler ve sâirleri bi ecma‘ihim meclis-i şer‘-i şerîfe yine mahalle-i mezbûre sâkinelerinden Âişe bt. Mehmed nâm hâtunu ihzâr ve muvâcehesinde her biri takrîr-i kelâm ve ta‘bîr ani’l-merâm edip merkūme Âişe mahallemizde sâkine olup lâkin kendi hâlinde olmayıp dâimâ sâkine olduğu menziline ricâl ve nisâdan birbirine nâ-mahrem getirip mu‘âmele-i fuhş ve fısk ettirdiğinden mâ‘adâ kendi dahi kat‘â nâ-mahremden ictinâb etmeyip niçin bu makūle ef‘âl edersin deyû mukaddemâ birkaç def‘a tenbîh ettiğimizde mütenebbih olmayıp her birimize şütûm-ı galîza şetm eder el-hâsıl mezbûre Âişe eyü hâtun değildir mahallemizden ihrâcına tenbîh olunmak matlûbumuzdur eğer ihrâc olunmaz ise merkūmenin tarafeynden mahallemizde bir fesâd olmak mukarrerdir deyû merkūme Âişe’nin sû-i hâlinden her biri haber vermeğin merkūme Âişe ba‘de’l-yevm mahalle-i mezkûreden ihrâc olunmak üzre, işbu vesîka mâ hüve’l-vâki‘ gıbbe’t-taleb ketb olundu. Fi’s-seneti’l-mezbûre. Şuhûdü’l-hâl: es-Seyyid Yusuf Çelebi b. Ali, İbrahim Çelebi b. Bayram, Nasuh Efendi b. Sâbit Râcil, Hüseyin Beşe b. Receb.