Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 588 Hüküm no: 754 Orijinal metin no: [114b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimo v. Keto’nun bağını Yusuf Ağa b. Abdülmennân’ın bağı ile değiştirmesi Havâss-ı Aliyye kazâsına tâbi‘ Avasya nâm karye ahâlîsinden Dimo v. Keto nâm zimmî meclis-i şer‘-i şerîfde bi’l-fi‘l ser-bostâniyân-ı hâssa olan umdetü’l-havâs ve’l-mukarrebîn izzetlü Ağa hazretlerinin hazînedârı işbu râfi‘ü’l-kitâb fahrü’l-akrân Yusuf Ağa b. Abdülmennân tarafından ikrâr-ı âti’l-beyânı tasdîke vekîl-i sâbitü’l-vekâlesi olan el-Hâc Hüseyin Bey b. Hasan mahzarında ikrâr ve takrîr-i kelâm edip silk-i mülkümde münselik olup karye-i mezbûrede vâki‘ bir tarafı Osman tarlası ve bir tarafı Zafiri tarlası ve bir tarafı Devecioğlu tarlası ve bir tarafı Meydancı tarlası ile mahdûd tahmînen üç dönüm bir kıt‘a mülk bağımı müvekkil-i mezbûr Yusuf Ağa’nın karye-i mezbûrede vâki‘ bir tarafı Köroğlu mülkü ve bir tarafı Osman tarlası ve bir tarafı Mûytâb Nikola tarlası ve bir tarafı tarîk-i âm ile mahdûd tahmînen üç dönüm bir kıt‘a mülk bağı ile bi tarîki’l-mukābaza tarafeynden îcâb ve kabûlü hâvî mezbûr Yusuf Ağa’ya bey‘ ve teslîm ve temlîk ol dahi ber vech-i muharrer iştirâ ve tesellüm ve kabûl eyledikden sonra ba‘de’l-yevm sâlifü’z-zikr benim bağım müvekkil-i mezbûr Yusuf Ağa’nın mülkü ve müvekkil-i mezbûrun bağı benim mülküm olmuşdur keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin ve’l-ışrîn min Şevvâli’l-mükerrem fi’s-seneti’l-mezbûre Şuhûdü’l-hâl: Hüseyin b. Ali, Mehmed b. Eyüb, Mehmed b. Mahmud, Ali b. Abdullah, İskerlet [v.] Riga, Yanaki [v.] Yorgaki, Yorgaki [v.] Yanaki, Palaş [v.] Riga, Nikola [v.] Dimo.