Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 588 Hüküm no: 755 Orijinal metin no: [114b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Lagari bt. Yorgi’nin bağını Yusuf Ağa b. Abdülmennân’a satması Havâss-ı Aliyye kazâsına tâbi‘ Avasya nâm karye sâkinelerinden Lagari bt. Yorgo nâm nasrâniyye tarafından husûs-ı âti’l-beyânı ikrâra vekîl olup hasm-ı câhid-i şer‘î mahzarında Dimitri v. Apostol ve Nikola v. Dimo nâm zimmîler şehâdetleriyle şer‘an vekâleti sâbite olan İskerlet v. Riga nâm zimmî meclis-i şer‘-i şerîfde bi’l-fi‘l ser-bostâniyân-ı hâssa olan umdetü’l-havâs ve’l-mukarrebîn izzetlü Ağa hazretlerinin hazînedârı olan işbu râfi‘ü’l-kitâb fahrü’l-akrân Yusuf Ağa b. Abdülmennân tarafından ikrâr-ı âti’l-beyânı tasdîke vekîl-i sâbitü’l-vekâlesi olan el-Hâc Hüseyin Bey b. Hasan mahzarında bi’l-vekâle ikrâr ve takrîr-i kelâm edip müvekkile-i mezbûre Lagari akd-i âtî sudûruna değin silk-i mülkünde münselik olup karye-i mezbûrede vâki‘ bir tarafı Zafiri tarlası ve bir tarafı İstamo tarlası ve bir tarafı Dekomi oğlu tarlası ve bir tarafı tarîk-i âm ile mahdûd tahmînen üç dönüm bir kıt‘a mülk bağını, cemî‘ tevâbi‘i ile müvekkil-i mezbûr Yusuf Ağa’ya yirmi dokuz esedî guruşa tarafeynden îcâb ve kabûlü hâvî bey‘-i bâtt-ı sahîh-i [şer‘î] ile bey‘ ve teslîm ve temlîk edip ol dahi minvâl-i muharrer üzre iştirâ ve tesellüm ve kabûl ve temellük eyledikden sonra semeni olan meblağ-ı mezbûr yirmi dokuz esedî guruşu müvekkil-i mezbûr Yusuf Ağa yedinden bi’t-tamâm ahz ve kabz eyledim ba‘de’l-yevm mârrü’z-zikr bağda vechen mine’l-vücûh alâka ve medhalim yokdur, müvekkil-i mezbûr Yusuf Ağa’nın mülk-i müşterâsı olmuşdur keyfe mâ yeşâ’ mutasarrıf olsun dedi dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Şuhûdü’l-hâl: es-Sâbikūn.