Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 589 Hüküm no: 756 Orijinal metin no: [114b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacda iken ölen Hüseyin Çelebi’nin küçük çocuklarına İbrahim Çelebi b. Hacı Bayram’ın vasî tayin olunması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Mehmed Bey es-Selâmi mahallesi sükkânından iken bundan akdem tarîk-i hacc-ı şerîfde vefât eden Hüseyin Çelebi b. Gülümşah nâm müteveffânın verâseti zevce-i metrûkesi Rukiye bt. Hasan nâm hâtuna ve sulbî sagīr oğulları Mustafa ve Abdürrezzak ile merkūme Rukiye’nin hamline münhasıra olduğu şer‘an zâhir ve mütehakkik oldukdan sonra haml-i mezkûr ile mezbûr Abdürrezzak babaları müteveffâ-yı mezbûrdan bi’l-irsi’ş-şer‘î intikāl eden mallarını hıfz ve sagīr-i mezbûr Abdürrezzak’ın ahvâlini bir vasî nasb ve ta‘yîn olunmak lâzım ve mühim olmağın hâkim-i muvakki‘-i sadr-ı kitâb tûbâ-leh ve hüsnü me’âb hazretleri dahi işbu hâmilü’l-kitâb İbrahim Çelebi b. el-Hâc Bayram nâm kimesne müstakīm ve dindâr ve her vechile vesâyet uhdesinde gelmeğe kādir olduğu sikāt-ı müslimîn ihbâr etmeleriyle haml-i mezbûr ile sagīr-i merkūm Abdürrezzak üzerine mezbûr İbrahim Çelebi’yi vasî nasb ve ta‘yîn eylelediklerinde ol dahi vesâyet-i merkūmeyi kabûl ve merâsimini edâya ta‘ahhüd ve iltizâm etmeğin mâ hüve’l-vâki‘ gıbbe’t-taleb ketb olundu. Fi’l-yevmi’s-sâdis ve’l-ışrîn min Şevvâli’l-mükerrem li sene ihdâ ve tis‘în ve elf. Şuhûdü’l-hâl: Mehmed Efendi b. Nasuh, Hüseyin Efendi b. Ahmed, Hüseyin Beşe b. Receb, Muharrem Çelebi b. Ahmed.