Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 590 Hüküm no: 757 Orijinal metin no: [114b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacda ölen Hüseyin Çelebi’nin küçük oğluna nafaka tayini Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Mehmed Bey es-Selâmi mahallesi sükkânından iken bundan akdem tarîk-i hacc-ı şerîfde vefât eden Hüseyin Çelebi b. Gülümşah nâm müteveffânın verâseti zevce-i metrûkesi Rukiye bt. Hasan nâm hâtuna ve sulbî sagīr oğulları Mustafa ve Abdürrezzak ile merkūme Rukiye’nin hamline münhasıra olduğu şer‘an zâhir ve mütehakkik oldukdan sonra haml-i merkūm ile sagīr-i mezbûr Abdürrezzak’ın tesviye-i umûruna kıbel-i şer‘-i hatîrden mansûb vasî olan işbu râfi‘ü’l-kitâb İbrahim Çelebi b. el-Hâc Bayram meclis-i şer‘-i enverde bi’l-vesâye takrîr-i kelâm ve ta‘bîr ani’l-merâm edip sagīr-i mezbûr Abdürrezzak’a babası müteveffâ-yı mezbûrdan irsen intikāl eden malından kadr-i ma‘rûf kifâye nafaka ve kisve-bahâ takdîr olunmak bi’l-vesâye matlûbumdur dedikde hâkim-i muvakki‘-i sadr-ı kitâb tûbâ-leh ve hüsnü me’âb hazretleri dahi sagīr-i mezbûrun nafaka ve kisve-bahâsı için târih-i kitâbdan yevmî sekizer akçe farz ve takdîr edip meblağ-ı mefrûz-ı mezkûru harc ve sarfa ve lede’l-hâce istidâneye ve vakt-i zaferde rücû‘a izin birle mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Şevvâli’l-mükerrem fi’s-seneti’l-mezbûre Şuhûdü’l-hâl: es-Sâbikūn.