Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 591 Hüküm no: 759 Orijinal metin no: [115a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacda ölen Hüseyin Çelebi’nin diğer küçük oğlu Mustafa’ya nafaka tayini Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Mehmed Bey es-Selâmi mahallesi sükkânından iken bundan akdem tarîk-i hacc-ı şerîfde vefât eden Hüseyin Çelebi b. Gülümşah nâm müteveffânın verâseti zevce-i metrûkesi Rukiye bt. Hasan nâm hâtun ve sulbî sagīr oğulları Mustafa ve Abdürrezzak ile mezbûre Rukiye’nin hamline münhasıra olduğu şer‘an zâhir ve mütehakkik oldukdan sonra sagīr-i mezbûr Mustafa’nın li ebeveyn ammi ve kıbel-i şer‘-i hatîrden mansûb vasîsi olan işbu râfi‘ü’l-kitâb Mustafa b. Gülümşah nâm kimesne meclis-i şer‘-i şerîfde bi’l-vesâye takrîr-i kelâm ve ta‘bîr ani’l-merâm edip sagīr-i mezbûr Mustafa’ya babası müteveffâ-yı mezbûrdan irsen intikāl malından kadr-i kifâye nafaka ve kisve-bahâ takdîr olunmak matlûbumdur dedikde hâkim-i muvakki‘-i sadr-ı kitâb tûbâ-leh ve hüsnü me’âb hazretleri dahi sagīr-i mezbûr Mustafa’nın nafaka ve kisve-bahâsı için târih-i kitâbdan yevmî sekizer akçe farz ve takdîr edip meblağ-ı mefrûz-ı mezkûru harc ve sarfa ve lede’l-hâce istidâne ve vakt-i zaferde rücû‘a izin birle mâ hüve’l-vâki‘ bi’t-taleb ketb olundu. Fi’l-yevmi’s-sâdis ve’l-ışrîn min Şevvâli’l-mükerrem li sene ihdâ ve tis‘în ve elf. Şuhûdü’l-hâl: Mehmed Efendi b. Nasuh, Hüseyin Efendi b. Ahmed, Hüseyin Beşe b. Receb, Hasan b. Abdullah.